Charter Document - 06480096
| Charter Number: | 06480096 |
|---|---|
| Cartulary Title: | Historical papers and letters from the Northern Registers [York] |
| Charter Language: | Latin |
| Charter Origin: | Religious |
| Charter Type(s): | Request |
| Date: | 1301 |
| Date type: | Internal, Calendar, Episcopal |
| Resource Link(s): |
Borthwick Institute - Register 6 (f226r) |
Charter:
Precordialissimo in Christo filio amico suo fidissimo domino Johanni de Langeton cancellario Anglie et canonico Eboracensi paratam ad beneplacita voluntatem cum benedictione et gratia Salvatoris Ecce licet nuper domino Petro de Tadington nomine senescalli et marescali domini nostri regis centum solidos pro palefrido nostro qui tantum non valet nec valuit quem nomine feodi sibi ut dicunt debiti vindicant solvi fecimus ipsi tamen per vicecomitem Notinghamie de die in diem pro aliis centum solidis quos nihilominus pro feodo hujusmodi exigunt graviter faciunt nos distringi quamquam ad plus ut nobis datur intelligi pro feodo hujusmodi nullatenus teneamur Quapropter amicitiam vestram affectuose rogamus quatenus nobis velitis certitudinaliter rescribere quantum de jure pro feodo hujusmodi solvere debeamus et juxta vestrum rescriptum quod debitum et justum fuerit promptius faciemus Quod si ad plus solvendum quam centum solidos persolutos non teneamur de jure dignemini quesumus prefatis senescallo et marescallo per unum de vestris mandare quod nos dimittant in pace et injustis districtionibus ac exactionibus amplius non molestent et quod super hoc vicecomiti Notinghamie literas suas mittent alioquin remedium a curia regia super hoc vobis si placet faventibus requirere nos oportet Cui in his et aliis omnibus que placuerint vestra velitis beneplacita fiducialiter demandare Valete Data apud Burton idus Martii pontificatus nostri anno secundo