Charter Document - 06480095
| Charter Number: | 06480095 |
|---|---|
| Cartulary Title: | Historical papers and letters from the Northern Registers [York] |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1301 |
| Date type: | Internal, Calendar, Papal |
| Resource Link(s): |
|
Charter:
Bonifacius episcopus [] carissimo in Christo filio Edwardo regi Anglie illustri salutem et Apostolicam benedictionem Celsitudinis tue conditiones ac merita et devotionis affectus quem ad Deum et Apostolicam sedem ac Terram Sanctam hactenus habuisti ac te habere speramus et confidimus in futurum benigna consideratione pensantes ac attendentes quod moderni malitia temporis te sumptibus plurimis ac laboribus et angustiis aggravavit pia meditatione providimus ad te super hoc animum compassionis extendere ac tue providendo saluti Apostolice sedis munificentiam tibi super his reddere gratiosam Ut igitur nostre benignitatis affectum percipias cum effectu totum et quicquid de quibuscunque decimis in quibuscunque regni locis et partibus et quibuscunque temporibus olim per Apostolicam sedem in predicte Terre Sancte subsidium deputatis per te vel alium seu alios usque in hodiernum diem percepisti vel ad te pervenit tibi auctoritate Apostolica de mera gratia remittimus et donamus Ceterum quia occasione guerrarum turbationum et scandalorum que tibi in regno tuo insurrexisse noscuntur tu compulsus indigentia et necessitate coactus ecclesias et personas ecclesiasticas dicti regni per impositiones et exactiones illicitas forsitan aggravasti nos attendentes quod tu jam declinas ad senium et propterea saluti tue super his providere salubriter intendentes totum et quicquid per impositiones et exactiones hujusmodi per te vel per alium seu alios percepisti vel ad te inde pervenit eadem tibi auctoritate de gratia remittimus et concedimus ampliori absolventes te auctoritate prefata a qualibet excommunicationis sententia si quam propter ea incurristi Tu itaque fili benignitatem nostram devota mente respiciens ac mentem erigens et oculos reverenter ad Deum erga prefatam Terram Sanctam super his sic te liberalem exhibeas sicque Deo et ecclesie matri tue te gratum et devotum intentis studiis representes quod dignis attolli laudibus merearis Data Laterani quarto idus Martii pontificatus nostri anno septimo