Charter Document - 06480078

Reverendo in Christo [] devoti sui Ejusdem permissione Remensis Senonensis Rothomagensis Belvacensis Laudunensis Catalaunensis Lingonensis Aniciensis Ambianensis Tornacensis Morinensis Silvanectensis Parisiensis Autisiodorensis Gurcensis Carnotensis Namurcensis Abrincensis Ebroicensis Saginensis Lexoviensis Constantiensis Dolensis et Cenomanensis ecclesiarum ministri cum humili sui recommendatione felices ad vota successus Sanctam Romanam ecclesiam fundatam firmiter supra petram Altissimus sic erexit ut in ea mirabilem vos constitueret columnam virtutibus eminentem que cunctis ecclesiis ne concusse cujusquam adversitatis impetu in precipitii casum ruant opportuno providet adjutorii fulcimento Sane plenam vos credimus habere notitiam que et qualis ecclesie Gallicane ac totius regni fuerit hucusque conditio et qualiter ad ipsius regni impugnationem dispendium et gravamen hostilis iniquitas diversis partibus exercuerit usquam huc sue malignitatis impulsus Nunc autem ubi spes inhereat quod ministerio domini nostri summi pontificis per dominos cardinales ad has partes destinatos ab eo qui ad hoc laboribus indefessis totis studiis totisque conatibus institerunt guerra silere debet adversa proterva solito durius infremuit et nequior turbo pro dolor tempestatis irrupit Dum enim diebus istis Parisius pro certis ecclesiarum nostre sollicitudini commissarum negotiis regalem presentiam adissemus ecce nobis omnibus fere presentibus Flandrensis comitis ad eundem dominum nostrum regem nuntii venerunt et litere nuntiantes quod comes ipse ab omni vinculo quo ditioni regie obligatus fuerat vel subditus auctoritate propria se absolvens pro absoluto et libero se tenebat et sicut crebris rumoribus quos fide dignorum confirmat assertio supervenit idem comes qui preter fidelitatis debitum quo prefato domino regi tenebatur astrictus in presenti guerra fideliter sibi servire juraverat cum nuntiis Alemannie et Anglie regum dum ad prosecutionem tractatus pacis quem pro ecclesie Romane reverentia [predictus vero noster rex benignus admittebat] venire se finxerunt machinationibus prelo cutis et confederationi bus initis ad recolligendum in terra sua que in regni limitibus et quasi in faucibus hostium constituta dinoscitur inimicos qui sanguinem nostrum unanimiter sitiunt et ad depopulationem et finale excidium ecclesiarum et regni totis conatibus moliuntur et ad nocendum et si valeat per se ipsum diversos facit bellicos apparatus propter que rex ipse suique principes et barones qui tunc presentes ibidem aderant nos et alias regni ecclesiasticas personas constanter requisierunt instanter ut sibi circa defensionem tam necessariam et communem nos et tota ipsius regni ecclesia assisteremus auxiliis opportunis Nos itaque in hujusmodi freto tempestatis expositi advertentes nobis non solum ecclesiarum et regni ac etiam personarum sic in januis instare pericula quasi jam vibrare super capita propria gladios denudatos vias exquirere cogimur atque modos quibus nobis adversus frementes insultus regali providentia sine qua impossibile est negotia dirigi defensionis opportune remedia preparentur Et licet Constitutionis quam dominus noster nuper pro ecclesiastica edidit libertate non fuerit sicut a pluribus fertur intentio contra tam juste defensionis nostre presidium presertim in tam arcte necessitatis articulo ubi timor improvisus subitus et continuus intervenit inhibere quominus nos ceterique prelati et persone ecclesiastice regni ejusdem domino nostro regi pro hujusmodi communis defensionis suffragio in qua proprium versatur interesse cuilibet juxta nostrarum modulum facultatum opportunam subventionem sicut Divina et humana permittere jura videntur impendere debeamus precipue cum ecclesia Gallicana temporalium dicti regni non modicam partem obtineat que miserabili ruine exponitur nisi defensionis valide presidio salubriter occurratur Ad tollendum omnis hesitationis scrupulum cupientes de intentione et beneplacito memorati domini nostri effici certiores sibi duximus humiliter supplicandum ut sua benignitate procedat quod nos et tota ecclesia dicti regni absque transgressione Constitutionis ejusdem et sue indignationis offensa ipsi domino regi pro tam juste tam utilis et tam necessarie nostre defensionis subsidio subventionem congruam prout nobis et ceteris regni prelatis videbitur facere valeamus Quapropter paternitati vestre votis humilibus supplicamus quatenus apud eundem dominum nostrum velitis efficaciter interponere partes vestras ut votis nostris et supplicationibus non minus celeriter quam misericorditer condescendat nosque habeat vestra benignitas excusatos quod tales cursores et simplices nuntios ad vestram et dicti domini presentiam destinare presumpsimus cum notabiles persone ecclesiastice ita celeriter sicut tante exigit necessitatis instantia accedere vel redire non possent Cum etiam verisimiliter terreamur ne cursores quantumcunque celeres et experti competenti tempore valeant rediisse moneat vos pie pater ad compassionis effectum circa tantas et tam iniquas injurias molestias pressuras et angustias ecclesiarum et regni zelus justitie paterne pietatis officium et antique devotionis ac reverentie specialis affectus quem ad sanctam Romanam ecclesiam rex Francie et regni incole semper hactenus habuerunt qui in prefato domino nostro rege sic ferventer effervet ut contra pretacte Constitutionis edictum quantumcunque quorum suasionibus stimulatus nihil omnino permiserit hactenus attemptari licet frequenter auribus ejus inculcemus quod inclytus Anglie rex et multi principes nostri regis emuli prefatam Constitutionem in aliquo non observent Credimus enim firmiter quod alii prelati personeque majores ecclesiastice dicti regni si fuissent Parisius nunc presentes super premissis vestre dominationi nobiscum similiter supplicassent Sed ipsos propter hoc congregare vel ad eos mitti more periculum non permisit Clementissime pater predicta pericula ad hujus accelerationem negotii nos inducunt et specialiter metus probabilis quem timemus quod regni laicos urgebit necessitas et utinam aliquos voluntas non incitet ecclesiarum regni bona diripere nisi cum ipsis defensioni regni dicti communiter insistamus in personis prout cum licitum fuerit et in ecclesiarum facultatibus defensionis ejusdem onera subeundo Feliciter in Domino valeatis Data Parisius ij kalendas Februarii anno Domini MCC nonogesimo sexto