Charter Document - 06480076
| Charter Number: | 06480076 |
|---|---|
| Cartulary Title: | Historical papers and letters from the Northern Registers [York] |
| Charter Language: | Latin |
| Charter Origin: | Religious |
| Charter Type(s): | Request |
| Date: | 1296 |
| Date type: | Internal, A.D., Calendar |
| Resource Link(s): |
|
Charter:
Sanctissimo patri in Christo domino Bonifacio Divina providentia sacrosancte Romane ac universalis ecclesie summo pontifici Johannes Ejusdem miseratione Karliolensis ecclesie minister humilis cum reverentiali obedientia pedum oscula beatorum Generosa fecunditas matrem letificat sed quanto virtuose ior est soboles tanto ministratur occasio gaudii amplioris Verum inexhausta fertilitas Universitatis Oxoniensis tales ac tantos benedictionis filios in sortem Domini parturire non desinit quum vere censetur mater et nutrix studii Anglicani et materno affectu a cunctis meretur sapientie amatoribus honorari Proinde cum gloria patris sit filius sapiens gratiosa dici debet in oculis Summi Patris que talium filiorum sapientia et devotione multiplicat domum Dei Cum igitur ut intellexi Apostolica dudum providentia Universitates regni Francie tali duxit privilegio insignire ut omnes qui gradum magistralis honoris in quacunque facultate assecuti fuerint in eisdem possint ubique terrarum lectiones resumere et easdem continuare pro sue libito voluntatis absque nove examinationis vel approbationis preludiis seu debito iterandi principii aut petende gratie cujuscunque pie paternitati vestre affectuose supplico et devote quatenus ad pacem et uniformitatem inter viros scolasticos affectione benevola augendam placeat benignitati Apostolice Universitatem prefatam Oxoniensem consimili dispensationis privilegio communire verisimiliter namque timetur a multis et magnis incolis regni Anglie quod pax viris studiosis summe necessaria inter Universitates diu servari non valeat illibata nisi Universitas Anglicana cum ceteris in libertatibus et actibus scolasticis concurrere mereatur Conservet Dominus sanctitatem vestram ad regimen universalis ecclesie per tempora diuturna Data apud Berewik iij die Septembris anno Domini MCC nonagesimo sexto