Charter Document - 06480075
| Charter Number: | 06480075 |
|---|---|
| Cartulary Title: | Historical papers and letters from the Northern Registers [York] |
| Charter Language: | Latin |
| Charter Origin: | Royal |
| Charter Type(s): | Decree |
| Date: | 1296 |
| Date type: | Internal, Calendar, Regnal |
| Resource Link(s): |
|
Charter:
Edwardus Dei gratia rex Anglie dominus Hibernie et dux Aquitanie venerabili in Christo patri Johanni eadem gratia Karliolensi episcopo salutem Evidentem cause nostre justitiam quam vos latere non credimus ferventi studio hactenus prosecuti et adhuc summo opere prosequentes pro recuperatione et defensione terre nostre Vasconiensis tanquam corone regie et honori regni nostri Anglie hereditario jure annexe de qua rex Francie nos injuste exheredare conatur ad partes ipsius ducatus gentes nostras nuper cum potentia quam tunc commode potuimus et nunc demum Edmundum fratrem nostrum cum honorabili comitiva nobilium dicti regni duximus destinandum Sane cum in homine non sit auxilium sed e celo ac propter hoc oporteat impotentiam nostram Divine manus presidiis sustentari paternitatem vestram requirimus et rogamus quatenus non solum nostram sed vestram justitiam intuentes et corda vestra sursum habentes ad Dominum apud Eum ut hec et alia que negotio expedire cognoveritis antedicto procedant salubriter et in manibus nostris prospere dirigantur devotis supplicationibus insistatis Cumque ob reverentiam sedis Apostolice et ad venerabilium patrum B[erardus] Albanensis et S Prenestrensis episcoporum sancte Romane ecclesie cardinalium requisitionem instantem ad tractandum de treugis et pace cum rege predicto super guerris dissensionibus et discordiis quibuscunque inter ipsum et nos exortis et motis sollemnes nuncios nostros ad partes miserimus transmarinas ad presentiam cardinalium predictorum piam affectionem vestram excitet quatenus debitum caritatis ad Divinam misericordiam vestris intercessionibus implorandum ut presentis temporis tempestuoso procellarum turbine quiescente uberiora tempora sub tranquillioris aure serenitate succedant quodque ad feliciter hec et alia peragenda que cepimus dextera Regis regum potenter adjuti ea ad laudem Ipsius et honorem nostrum ac commodum regni nostri ad optatum effectum deducere valeamus Premissa vero omnibus vestris subditis in vestra dioecesi constitutis specialibus orationibus facienda per vos injungi petimus et mandari Teste meipso apud Sanctum Albanum vj die Januarii anno regni nostri vicesimo quarto