Charter Document - 06480073

Bonifacius episcopus servus servorum Dei venerabili fratri episcopo Karliolensi salutem et Apostolicam benedictionem Dum sincere devotionis affectu grandia et utilia necessariaque servitia quibus dilecti filii Ubertus Raynaldi Ammannatus Rote Maynettus Raynalldi Gayetanus Oderisii et alii socii eorum cives et mercatores Florentini de societate Pullicum et Rembertinorum de Florentia erga nos et Romanam ecclesiam ac nonnullos ex fratribus nostris sancte Romane ecclesie cardinalibus diu viguisse ac incessanter vigere noscuntur eorum personas et bona pro nobis ecclesia et nonnullis ex dictis fratribus tam gratanter quam utiliter et necessario exponentes diligenti meditatione pensamus dignum reputamus et debitum ut eorum commodis favorabiliter in quibus cum Deo possumus intendamus Cum igitur in regno Scotie pro carissimo in Christo filio nostro Edwardo rege Anglie illustri qui ad Terre Sancte subsidium suscepit venerabile signum crucis fuerint per felicis recordationis Nicholaum papam Quartum predecessorem nostrum decime imposite ad sex annos tuque per ipsam Romanam ecclesiam in dicto regno Scotie earundem decimarum collector fueris deputatus certis pactionibus et conventionibus initis inter eandem ecclesiam et dictum regem nos nolentes pacta et conventiones hujusmodi in aliquo immutari sed in sui roboris persistere firmitate ac de dictorum mercatorum fide legalitate et sufficientia plenaria confidentes consideratione quoque dilectorum filiorum nostrorum Matthei Sancte Marie in Porticu et Neapoleonis Sancti Adriani diaconorum cardinalium volumus et per Apostolica tibi scripta in virtute obedientie districte precipiendo mandamus quatenus dilectis filiis Durazo Uberti Abracha Gerardi Gyrardo Symonetti et Reynerio Bellinzonis civibus et mercatoribus Florentinis de societate predicta eorundem Uberti Ammannati Maynetti et Gayetani mercatorum sociis vel aliquibus seu alicui eorundem has nostras literas deferentibus qui plene ac sufficienter sunt idonei et solvendo decem millia marcarum bonorum et legalium sterlingorum de pecunia dictarum decimarum ad quarum collectionem fuisti in regno Scotie ut premittitur deputatus assignare procures liberaliter et integre absque cujuslibet dilationis diffugio et difficultatis obstaculo in depositum nomine nostro et ecclesie prelibate infra unius mensis spatium post receptionem presentium sub certa forma tenenda et conservanda fideliter prout in prefatis pactis et conventionibus dicitur contineri Itaque semper ad mandatum ipsius ecclesie prefata possit pecunia re haberi non obstantibus quibuscunque literis dilecti filii fratris Petri de Marrone olim Celestini pape Quinti antecessoris nostri super assignatione cujus vis quantitatis dicte decime apud societates vel personas alias deponende faciens de assignatione hujusmodi duo confici publica et consimilia instrumenta quorum uno penes te pro ipsius ecclesie cautela retento reliquum ad nostram cameram per fidelem nuntium absque dilatione transmittas Ceterum in dicta decem millium marcarum summa nequaquam computari vel de ipsa deduci volumus si qua de decima supradicta per te vel etiam per venerabiles fratres vestros [] Lincoln et Winton episcopos deputatos in regno Anglie prefate decime collectores apud predictos mercatores de prefata societate Pullicum et Rembertinorum deposita dinoscuntur cum nostre intentionis existat quod preter illa per te apud mercatores et societatem eosdem predictarum marcarum decem millia deponantur Volumus insuper quod mercatores ipsi ad restitutionem hujusmodi apud eos deponende pecunie aut illius si qua per te vel episcopos ipsos jam deposita fuerit apud eos tibi vel alii faciendum per te vel alium compelli nequeant vel arctari neque teneantur ad illam absque Apostolice sedis expressa licentia vel mandato faciente plenam et expressam de presentibus literis mentionem Data Anagnie id Septembris pontificatus nostri anno primo