Charter Document - 06480067
| Charter Number: | 06480067 |
|---|---|
| Cartulary Title: | Historical papers and letters from the Northern Registers [York] |
| Charter Language: | Latin |
| Charter Origin: | Religious |
| Charter Type(s): | Commendation |
| Date: | 1294 |
| Date type: | Internal, A.D., Calendar |
| Resource Link(s): |
Borthwick Institute - Register 4 (f152r) |
Charter:
Sanctissimo in Christo patri et domino domino Celestino Divina providentia universalis ecclesie summo pontifici suus servulus et sacerdos Johannes eadem permissione Eboracensis archiepiscopus Anglie primas cum recommendatione devota et subjectione omnimoda humillima pedum oscula beatorum Letetur ecclesia sancta mater cetus fidei catholice jubilando exultet orbisque gaudeat universus dum tanta lucerna in vestra parochia quod decus morum speculumque humilitatis existit supremo exposita candelabro ut luceat caput erigitur plebi Christi Nec memor sit ecclesia luctus illius amplius quo nimirum lugebat vacationem diutinam summe sedis quin potius deposita veste lugubri ornet se splendida et jocunda amplectatur facie sponsum novum Psallens eum tripudio et applausu prior tristitia convertitur in gaudium luctus in citharam et abundat solatio que fuerat desolata Hujus autem solatii Eboracensis ecclesia mee parvitatis commissa regimini parte non caret precipua propter immediationem presertim quia sancte Romane ecclesie cujus noscitur decorata patronis nullo medio est subjecta Inde est quod ad sanctitatis vestre pedes pro statu ecclesie mee vestre ancille gressu confidentiori recurro sperans a vestra clementia impetrare felicius quod ejus honori vestra decreverit eminentia convenire Paternitati vestre igitur sanctissime humiliter supplico et devote quatenus dilectis in Christo magistris Reginaldo de Sancto Albano et Willelmo de Beverlaco procuratoribus meis et nuntiis vel eorum alteri quem in sancta Romana curia adesse contigerit in meis et ecclesie mee predicte exponendis negotiis aures velitis prebere benignas eaque cum vestre liberalitatis gratia favorabiliter exaudire Conservet vitam et incolumitatem vestram ecclesie Sue sancte Altissimus per tempora feliciter successiva Date apud Burton iij idus Novembris anno gratie MCC nonagesimo quarto