Charter Document - 06480060
| Charter Number: | 06480060 |
|---|---|
| Cartulary Title: | Historical papers and letters from the Northern Registers [York] |
| Charter Language: | Latin |
| Charter Origin: | Religious |
| Charter Type(s): | Blessing |
| Date: | 1293 |
| Date type: | Internal, Calendar, Episcopal |
| Resource Link(s): |
Borthwick Institute - Register 4 (f21r) |
Charter:
Johannes primas [] dilecto in Christo filio [] officiali nostro Eboracensi salutem gratiam et benedictionem Quas et quantas aeris intemperies imbriumque stillato prodiga incommoditates ingerant his diebus fructus pendentes ad usus producti humanos intuentibus non absque stupore ostendunt dum fructuum ipsorum sperata fertilitas ad inopinatam sterilitatem pro dolor tali turbine redigitur nisi benignius plebi Sue de excelsis prospiciat sancta clementia Creatoris Sed hoc quippe efficiunt peccata hominum qui arridentes prosperis tanquam ingrati fuerunt immemores Largitoris Restat igitur ad Ipsum solum recurrere Cujus misericordia excedit judicium et quia de conversione gaudet peccatorum orationibus insistendo humiliter et precibus ut Ipse mitis et mansuetus Dominus Deus iram Suam avertat a populo Suo pretioso sanguine quem redemit Discretioni itaque vestre injungimus et mandamus quatenus faciatis quantocitius poteritis publicari quod tam in nostra cathedrali quam in aliis collegiatis et conventualibus ac singulis parochialibus ecclesiis nostre dioeceseos omni quarta et sexta feria devoto processiones fiant cum decantatione letaniam sollemni et specialiter oratio dicatur in missis pro serenitate aeris omni die similiter et pro domino nostro rege et statu regni totiusque populi Anglie ut frequentem pulsationem Salvator exaudiens creature subveniat quam ad Suam creavit imaginem ipse Deus Hec in singulis archidiaconatibus per locorum [] archidiaconos eorumque officiales faciatis celeri executioni mandari Bene valete Data apud Thorp vj idus Junii pontificatus nostri anno viij