Charter Document - 06480059

Johannes primas [] dilecto in Christo filio [] officiali Eboracensi salutem gratiam et benedictionem Cum dudum venerabilem fratrem dominum A Dunelmensem episcopum suffraganeum nostrum primo sufficienter et legitime monuerimus ac moneri fecerimus quod Johannem de Amelia auctoritate Apostolica notarium publicum et Willelmum de Wrelton dictum de Pik clericos nostros quos ad suam presentiam quam in ecclesia Dunelmensi juxta scita canonum reperire credidimus cum nostris et vestris literis mandata canonica continentibus destinaverimus quosque Johannes de Meydenstan constabularius Dunelmense et sui complices ceperant et fecerant carcerali custodie mancipari ipso episcopo hoc mandante vel quod suo nomine factum fuerat ex post facto ratum habente liberaret et liberari faceret ac restitui pristine libertati dictis clericis super violentia nobis ecclesieque nostre Eboracensis de injuria et contemptu commissis pro facto hujusmodi satisfaceret competenter sed dicto episcopo monitis hujusmodi parere et ea facere negligente seu penitus non curante debite obedientie et salutis sue proprie nusquam memor eidem episcopo per nostras alias literas sub pena sententie suspensionis ab ingressu ecclesie quam in eum in scriptis protulimus si mandatis nostris omiserit obedire ut dictos clericos nostros quos in carcere suo in castro suo Dunelmensi captivos notorie detinebat liberaret et permitteret illesos abire eisque nobis et ecclesie nostre predicte pro commisso hujusmodi satisfaceret competenter et satisfieri procuraret ac ipse episcopus commissam inobedientiam multiplicans et velut aspis ad vocem incantantium aures suas obturans mandata sibi destinata obaudiens dictos clericos non liberavit sed captivos detinuit sicut prius propter quod tertio eidem episcopo nostris dedimus literis in mandatis quod sub pena sententie excommunicationis quam in scriptis in personam ipsius protulimus justitia exigente si mandatis nostris ultro contemptibiliter duxerit resistendum quod sepe factos clericos de captivitate hujusmodi liberaret eosque libero abire permitteret eisdem nobis et ecclesie nostre quos notorie contra Deum et justitiam ac debitam obedientiam ac anime ipsius salutem constiterat offendisse juxta juris exigentiam satisfaceret competenter Verum dictus episcopus ut videtur quodammodo a fide recedens que debita obedientia roboratur cum non nisi per inobedientiam scisma in Dei ecclesia generetur ac testante Beato Gregorio sola obedientia est que fidei meritum possidet sine qua quisquis infidelis committitur etiam si fidelis esse videatur mandatis nostris canonicis obedire contemptibiliter vilipendens memoratos clericos infra terminum ad liberandum sibi per nos juxta qualitatem negotii legitime deputatum nullatenus liberavit sed in cleri opprobrium totius ecclesiastice discipline contemptum dictorum clericorum nostri et ecclesie nostre prejudicium et gravamen eosdem post mandata nostra ut predicitur multiplicata captivos sicut prius carceri detinuit diutius mancipatos licet per remedium curie secularis secundum legem regni non alicujus nostri auctoritate mandati eos denuo liberasset propter que non est dubium episcopum antedictum in dictas suspensionis et excommunicationis sententias ut premittitur rite latas merito incidisse Et quia nil obedientia prodesset humilibus si contumacia contumacibus non obesset nos volentes per censuram ecclesiasticam ac ipsius executionem que ab omnibus catholicis est timenda ipsius episcopi culpis exigentibus pariter et offensis legitime procedere contra eum ut ceteris devotis ecclesie filiis innotescat damnabilis status ejus ne sua occasione pestifera grex ulterius inficiatur Dominicus neque quem Dei timor a malo non revocat hunc saltem cohibeat coercio ecclesiastice discipline et rubore confusus ad satisfactionem venie et debitam obedientiam compellatur vobis auctoritate nostra committimus ut contra memoratum episcopum ad declarationem predictarum sententiarum ac executionem et publicationem earundem sic debite procedatis quod vestram debeamus industriam merito commendare denuntiantes et publicantes per vos aut per alium deputandum a vobis in locis sollemnibus nostre Ebor dioeceseos quibus competentius poteritis episcopum antedictum in dictas suspensionis et excommunicationis sententias incidisse et eas ut premittitur incurrisse Ad quam executionem faciendum et omnia et singula ipsam contingentia secundum quod de jure fuerit faciendum ac etiam procedendum vobis plenam committimus potestatem Qualiter autem commissionem nostram fueritis executi de receptione presentium et quid in premissis feceritis nobis quanto citius certificare curetis per vestras patentes literas harum seriem continentes Data apud Sanctum Martinum juxta Viterbium vj idus Aprilis anno gratie MCC nonagesimo secundo et pontificatus nostri septimo