Charter Document - 06480051
| Charter Number: | 06480051 |
|---|---|
| Cartulary Title: | Historical papers and letters from the Northern Registers [York] |
| Charter Language: | Latin |
| Charter Origin: | Religious |
| Charter Type(s): | Request |
| Date: | 1287 |
| Date type: | Assigned |
| Resource Link(s): |
Borthwick Institute - Register 4 (f147v) |
Charter:
Sanctissimo in Christo patri et domino reverendissimo domino Honorio Divina providentia summo pontifici sacrosancte universalis ecclesie suus sacerdos J primas ejusdem [] cum recommendatione devota et subjectione omnimoda pedum oscula beatorum Obtinet Lincolniensis ecclesia unde letari debet et gratias referre dignissimas totius gratie Largitori Ab ipsa quidem jubar egrediens totum regnum illuminat et miri luminis fulgore illustrat In ea siquidem pie recordationis domini Roberti quondam loci ejusdem episcopi quiescunt reliquie qui in celesti rosario flos fragrans inseritur et Sanctorum collegio novus collega adjungitur ut speratur cujus mors quam sit in conspectu Altissimi pretiosa frequentia miraculorum tam merita vivi quam premia defuncti preconizantium populis ad ipsius patris tumulum undique confluentibus publice manifestat Cum igitur tanti patris memoria negligentie tumulo sepelienda non fuerit nec oblivionis tumulanda sepulcro sancte paternitati vestre supplico reverenter quatenus cum de his vobis per inquisitionem canonicam constiterit predictum patrem Sanctorum catalogo sicut honori Dei et ecclesie expedire videritis jubeatis ascribi digne enim verti debet in memoriam hominum qui ad consortium migrasse creditur angelorum Vitam et incolumitatem vestram conservet Altissimus ecclesie sue sancte per tempore prospera et longeva Data []