Charter Document - 06480046
| Charter Number: | 06480046 |
|---|---|
| Cartulary Title: | Historical papers and letters from the Northern Registers [York] |
| Charter Language: | Latin |
| Charter Origin: | Religious |
| Charter Type(s): | Notification |
| Date: | 1284 |
| Date type: | Internal, A.D., Calendar, Episcopal |
| Resource Link(s): |
Borthwick Institute - Register 3 (f80r) |
Charter:
W[illelmus] permissione Divina Eboracensis archiepiscopus Anglie primas dilectis in Christo filiis capitulo Beverlacensi salutem gratiam et benedictionem Quam placidum quamque Divino Numini acceptum fuerit Sanctorum corpora sanctarum habitacula animarum que angelicis coram Christo allate preconiis eterna perenniter vivere noscuntur in patria dignis obsequia libis honoribus venerari inter [] celestis illa beatitudo indicat et trine excitationis indicium quam Sanctus Lucianus electus Dei presbyter urgenti sopori deditus a Beato Gamaliele ethereo nuncio receperat ut beatorum tumulos ob salutem populi patefaceret evidenti miraculo manifestat Ad laudem itaque Creatoris altissimi Qui in virtute athletarum merentium piissime gloriatur et augmentum glorie sanctorum supernorum civium qui in tumulo honoris college cujuslibet exultant gaudentius et letantur pretiosissimas reliquias beati presulis et gloriosi confessoris Willelmi que in ecclesia nostra Eboracensi conduntur in imo die Dominica proxima post instans festum Epiphanie Domini a loco in [] quo diutius recepte fuerant Divina favente clementia transferre intendimus et in celebri capsula ut condecet in eadem ecclesia venerabiliter collocare Quocirca devotionem vestram intime exhortamur quatenus apud Deum orationes fundere meditemini humillimas et in ecclesia vestra orari faciatis attente ut pius et misericors ipse Salvator noster annuat gratius et concedat tam sancti patris translationem prospere inchoari laudabiliter mediari et benigno Ejusdem prestante suffragio feliciter consummari ad gloriam et exaltationem Sui nominis Qui prefatum Sanctum Suum tante sollemnitatis decore dignum reddidit et salubrem edificationem plebis nostro presertim commisse regimini cui prefuit idem pastor Bene valete Data apud Otteley v kal Januarii anno Domini millesimo ducentesimo octogesimo quarto et pontificatus nostri anno quinto