Charter Document - 06480039
| Charter Number: | 06480039 |
|---|---|
| Cartulary Title: | Historical papers and letters from the Northern Registers [York] |
| Charter Language: | Latin |
| Charter Origin: | Religious |
| Charter Type(s): | Complaint |
| Date: | 1281 |
| Date type: | Internal, Calendar, Episcopal |
| Resource Link(s): |
Borthwick Institute - Register 3 (f45r) Borthwick Institute - Register 3 (f150r) |
Charter:
Reverendissimo [] Firma et viscerali confederatio quam speramus vestri gratia adinvicem conceptione verbali utinam reali et placida efficacia contraxisse nobis tanquam vestro votivo benevolo prebet solidam audaciam ad relevamen et presidium vestre paternitatis sine diffidentia convolandi Ecce igitur amantissime pater quidam suffraganeus noster videlicet episcopus Dunelmensis in quem de jure communi nobis actus et officium competit visitandi per abusionis et protervitatis superbiam pretextu caduce prosperatis que sibi temporaliter affluit et arridet visitationem et auctoritatem nostram metropoliticam effrontes et contumaciter subterfugit et evitat nec nobis quamquam pluries requisitus aliquod munimen contra hujusmodi jus commune quo fulcimur exhibet vel pretendit sed rebellis et reluctans premunitiones prefixiones monitiones et cetera officio nostro inherentia per elusionem commenta et per concitationes laicalis resistentie nos qui nil querimus nisi Christum irreverenter irridet parvi reputat et subsannat nec curat de vinculo professionis sue nec etiam de observatione sacramenti quod in consecratione sua publice edidit in altari videlicet ut archipresuli Eboracensi et metropolitice ecclesie ejusdem loci obediens existeret et devotus Cum igitur super his torpere non deceat manum nostram ipsius obstinationem medicinaliter prosequimur ut sanetur unde obtentu Dei et vestri meriti in extremis perspicax et confidens vestrum consilium in hujusmodi mentis angustia suppliciter invocamus ne ipsius suffraganei pompatica et temporalis affluentia officium nostrum quod Deo et juri directe innititur deprimat vel retardet Si enim nobis compassionem et auxilium efficaciter sicut confidimus impenderitis vix quicquam nocivum consurget quod nos per Dei gratiam contristabit Et benedictus oriens ex alto Qui tantum et talem nobis immo universali ecclesie in solamen et subsidium digne disposuit et prefecit Et ecce pater predilecte si qui volueritis ad vestra beneplacita totus vester materiam autem hujusmodi contingentem dicti suffraganei insolentiam vobis alias in curia prout memoriter retinetis sicut credimus evidenter tetigimus et expresse et utinam occurrat efficaciter menti vestre Conservet [] Data apud Hext primo vj kalendas Julii et apud Alwenton vij idus Julii pontificatus nostri anno secundo