Charter Document - 06480038
| Charter Number: | 06480038 |
|---|---|
| Cartulary Title: | Historical papers and letters from the Northern Registers [York] |
| Charter Language: | Latin |
| Charter Origin: | Religious |
| Charter Type(s): | Appeal |
| Date: | 1280 |
| Date type: | Internal, A.D., Calendar, Episcopal |
| Resource Link(s): |
Borthwick Institute - Register 3 (f40r) |
Charter:
Sanctissimo et reverendo patri ac domino confidenti domino N Dei providentia sacrosancte Romane ecclesie summo pontifici suus devotissimus servulus et sacerdos W permissione eadem Eboracensis ecclesie minister humilis Anglie primas devotissima pedum oscula beatorum cum jugi precum instantia erga Deum Ad suggerendum clementie vestre quedam que ad perutilem premunitionem sanctitatis vestre corde concepi invitat et excitat causa Christi et benedictus Altissimus Qui universali ecclesie tam egregium contulit de vobis dominum dignissimum et fulciamne de quo toti cultui Christiano quin potius toti orbi immensum consurget gaudium Deo dante et complebuntur undique pretermissa Ecce enim pater reverende licet de virenti et florida potentia domini regis Anglie erga relevamen et subsidium Terre Sancte hactenus fuerit forsitan confidendum ob multa tamen noviter emergendo iter non arripit nec arripiet preconceptum nec sicut pro vero jam didici hujusmodi peregrinationem aliquo casu faciet ista vice unde si ejus inculpabilem impotentiam per quamquam indigentiam regni Anglie suppleri volueritis prout fructuose expedit sicut credo non est aliquis in eodem regno meo dico judicio cui hujus onus confidentius et convenientius quam ejusdem regis germano domino Edmundo valeat applicari Ipsius enim persona adeo apud universos incolas regni valde constans et amabilis unanimiter acceptatur quod si de dispositione vestra sic procederet immenso et pergrandi gaudio crearetur dummodo decima ejusdem regni ad subsidium Terre Sancte in ejusdem Edmundi et commilitonum suorum stipendia de liberalitate et gratia vestra cederet recollecta Totum etiam regnum in hujusmodi Christi negotio ipsum votivis viribus adjuvaret et eo pronius et promptius sicut credo quod hujusmodi peregrinatio est sicut publice et gaudentur asseritur admodum sibi cordi et pericula ipsius terre alias sub variis discriminibus hilariter subiit et devote infirma insuper ipsius loci secreto et subtiliter scrutabatur Ipsius etiam devotio ex preteritis laboribus in tantum accenditur et augetur quod alios prepotentes et validos ad peregrinandum et cum eodem cum peregrinari contigerit juxta vires continuo animat et inducit Ad gratiam igitur supradictam de decima sibi si placet concedenda domini regis germani sui ingens desiderium et omni indigenarum fixa firmiter confidentia ac ingens et votiva strenuitas ipsius Edmundi et precipue vestra incensa et coaptata caritas qua totus orbis jam allicitur dominationem vestram sicut spero meritorie et finaliter invitabunt ad laudem et gloriam Crucifixi Pater sancte exilitatem tantilli peccatoris quotidie dum vixero apud Redemptorem pro vobis votive per Dei adjutorium pretendam et immolabo ara Christi Conservet dominum meum et sue ecclesie Deus per tempore diuturna Data apud Wylton xij Kalendas Septembris anno domini MCCLXXX et pontificatus primo