Charter Document - 06480032

Reverendo in Christo patri et domino [] Dei gratia tituli Sancte Praxedis diacono cardinali W[alterus] permissione Ejusdem Eboracensis ecclesie minister humilis seipsum intimo et cordali affectu cum omni reverentia prosperitate et honore Pater reverendissime multa his diebus et a multis retro temporibus nos infortunia et angustie varie concusserunt verumtamen erubescimus et tristissimo tedio desolamur quod impotentiam aliquam quavis ex causa tanto patri et benevolo pertendere compellimur aut flebili inopia pauperrime denudare Scitis siquidem pater carissime quot guerrarum dispendia inclytum regnum Anglie quod quondam abundabat in singulis ad omnium defectum miserias immo quasi in nihilum redegerint Audistis insuper sicut credimus quot onera debitorum in ecclesia nostra Ebor que nequaquam vel vix enarrare sufficimus nos opprimunt et elidunt de quibus felicis recordationis dominus et promotor noster Clemens papa nobis gratiose concessit ut mille marce de modica fortuna nostra in partem solutionis eorundem annis singulis solveremus Que quidem annalis solutio nos ad plurima que vellemus efficit penitus impotentem Immoderata etiam bonorum nostrorum si que suppetant circa regimen regni Anglicani jugis insuper et inevitabilis effusio nos mirabiliter depauperat et angustat Caristia etiam divites et pauperes in partibus nostris egra et pergrandi egestate perculit et contrivit nec a subditis vel aliis propter hoc nimirum reperimus relevamen Ecce igitur que solutionem nostram quod nos tedet novit Omnipotens in nostram erubescentiam et dedecus quod timemus adeo distulerint sed si onus istius solutionis in capitulum nostrum Eboracensem fuisset unanimiter translatum prout bono zelo et optima fide ad securitatem et commoditatem vestri alias sperabamus Deo et utrique nostrum modo forsitan complaceret Et nisi spes hujusmodi hactenus sub fuisset aliud saltem in parte et pro posse dominationi vestre fecissemus quicquid nobis incommodi contigisset Verum ne ipsa solutio saltem in toto ulterius tardaretur in nundinis Sancti Botulfi ducentas marcas ad opus vestrum fecimus numerari que nobis non sine tedio sed laudetur Altissimus gratius obvenerunt Speramus etiam domine confidentissime sub curiali et pia compassione vestra in residuo prout Deus benignitati vestre inspiraverit velut vester devotissimus respirare et eo si placet facilius quo consideratis sumptibus quos in reparatione domorum archiepiscopatus et sustentatione jurium ipsius fecimus et quotidianis vicibus impendimus paucam et exilem summam nostris usibus applicamus Utinam domine reverende vota et precepta vestra possemus adeo tamque prosperis effectibus adimplere sicut id hilari corde firmiter affectamus Conservet vos et ecclesie et populo Suo Deus per tempora diuturna Data London ij kalendas Augusti anno gratie MCCLXX secundo