Charter Document - 06480030
| Charter Number: | 06480030 |
|---|---|
| Cartulary Title: | Historical papers and letters from the Northern Registers [York] |
| Charter Language: | Latin |
| Charter Origin: | Religious |
| Charter Type(s): | Commendation |
| Date: | 1271 |
| Date type: | Internal, A.D., Calendar |
| Resource Link(s): |
Borthwick Institute - Register 2 (f75v) |
Charter:
Sanctissimo in Christo patri et domino [] Dei gratia summo pontifici W primas [] pedum oscula beatorum cum mentis et corporis inclinatione devota Domus Domini que in lapide adjutorii super fundamentum apostolorum et prophetarum Divinitus stabilitur sancta videlicet Romana ecclesia catholica que non solum synodicis institutis sed evangelica voce Salvatoris Domini nostri Jhesu Christi principatum obtinuit et Beato Petro et successoribus suis formam semper sacre eruditionis et statum incolumitatis accepit unde quod stipiti suo rami quod capiti a quo in totum corpus salus diffunditur membra singula quod fonti rivuli qui emanant et soli radii exeuntes hoc Apostolice sedis eminentie debent omnes ecclesie quas ubique terrarum religio Christiana fundavit Hinc est quod ecclesia Anglicana que tanto est Apostolice sedi devotior quanto ejus beneficia circa se pluries inculcata cognoscit de ipsius vacatione diutina inconsolabili afflicta dolore gemitus amariores effudit et Dominum rogavit instantius ut ecclesiam Suam oculo misericordie respiciens navem Petri et summi piscatoris sagenam procellis intumescentibus ulterius non committeret sed ei et toti populo Christiano de rectore idoneo provideret Et ecce clamantibus nobis ad Dominum et emittentibus preces cum lacrymis quasi vox lapsa de celo rumor insonuit affectio natus de vestra electione concordi qui nubilam publici meroris auferens corda omnium festiviore letitia serenavit Communis etenim fama est et vox omnium quod Dominus per gratiam Suam talem de filiis Suis in specula celsitudinis Apostolice collocare dignatus est qui prudentia et moribus preminens cathedram Petri meritis poterit adimplere In commune itaque cedit desiderium verboque celebri et votiva gratiarum actione publice recensetur qualiter de sapientia suaviter universa disponens vos de gradu in gradum de virtute in virtutem et de honore promoverit in honorem Quia ergo ex hominibus assumpti estis a Domino et pro hominibus in his que sunt ad Deum pontifex constituti Ipsi Qui vos elegit cum omnium gratiarum actione preces offero cum affectu quatenus Is Qui segregavit vos et vocavit ad dandum salutis scientiam plebi sue in bonis dies vestros continuet et ecclesiam suam ab omni errore purgatam sub regimine vestro et vestra provisione tranquillet Ad hec pater sancte me ipsum licet minimum ecclesie tamen Romane plantulam spiritualem et omnia que eadem ecclesia meo regimini commendavit vestre dominationi devote subjicio et committo licet quod vestrum est amplius nequeat esse vestrum Vestris igitur utamini sicut libet quia promptissimus sum et ero vestris jussiones etiam obsequiis prevenire Nam me vobis totum debere profiteor quod servus debere domino magistro discipulus et filius patri potest Non moveatur vestra paternitas pro eo quod celsitudinis vestre nomen proprium presentibus non inseritur quum in recessu presentium portitoris apud nos non extitit divulgatum Vitam et incolumitatem vestram conservet Altissimus per tempora longiora Data vj kalendas Martii anno Domini MCCLXX primo