Charter Document - 06480025
| Charter Number: | 06480025 |
|---|---|
| Cartulary Title: | Historical papers and letters from the Northern Registers [York] |
| Charter Language: | Latin |
| Charter Origin: | Religious |
| Charter Type(s): | Explanation |
| Date: | 1270 |
| Date type: | Internal, A.D., Calendar |
| Resource Link(s): |
Borthwick Institute - Register 2 (f73r) |
Charter:
Sanctissimo in Christo patri et domino [] Divina providentia summo pontifici suus humilis et devotus W permissione [] cum recommendatione devota pedum oscula beatorum Sedes Apostolica sedis Christi quam in celis tenet vicarius sic per Eum Qui Patris est sapientia dum pro nostra redemptione humane fragilitatis testa vestitus de potestate sibi celitus cohibente tanta pollet preminentia potestatis et excellentia gratie spiritualis quod ligat et solvit claudit et reserat reprimit et solatur seque gratam sic tribuit cuilibet postulanti quod juxta actionum suarum merita devotionisque fervorem reportet remedium et in suis defectibus sentiat in omni fortuna juvamen Hinc est quod cum specula constitutus sarcinam pre latere considerem mihi de dicte sancte sedis providentia commendatam nec sine metu ne deprimar casusve mihi vel mee tutele commissis immineat quoquo modo circumspiciam diligentius quo sustenter in vestre sanctitatis asylo meum pono refugium et ante oculos misericordie meum profero fiducialiter imperfectum Sed ecce pater piissime dum conceptum jam diu desiderium complere non possum ut scilicet juxta quod necessitas parvitatis mee deposcit ad insinuandum in vestre majestatis presentia personaliter oppressiones gravamina et defectus quibus incessanter una cum ecclesia perurgeor Beati Petri limina vestreque sanctitatis vestigia pia queram dolore concutior et a meroris incommodo me non potero continere Timeo namque quod guerrarum pericula et turbationum Anglice regionis incommoda licet sint admodum divulgata vestre pandantur celsitudini minus plene quorum et comminationes et indicia manifesta me angunt distrahunt et fatigant quod in intitulata mihi cura stare non possum vel Divinis intendere vix ad horam nedum terram exire tantis discriminibus jam submissam quinimmo parliamentis secularibus oportebit frequentius intendere iracundie tempora mitigare reconciliare discordes et que pacis sunt cum ordinatione regni pro viribus procurare Unde est quod labore consumor tediis crebris afficior totam substantiam non solum patrimonii spiritualis sed etiam hereditarii devorare compellor sicque dejicior circumquaque per continuationem gravaminum a tempore quo creabor quod vix potero jam sperare de potentia respirandi Tanto quippe premor onere debitorum cum per ea que predecessor meus usque ad summam quatuor mille librarum sterlingorum contraxit cum per ea que importunitas maxima ob causas pretactas contrahere me coegit Hec autem in generali sic tacta per singulas earumdem causas specificare non audeo ne longa scriptura tedium pariat auribus occupatis sed vive vocis oraculo quatenus ea vestra benignitas audire decreverit dilecto mihi magistro Ricardo de Nedham procuratori meo recitanda committo majestatis vestre pedibus provolutus supplicans humiliter et devote quatenus meam absentiam personalem tanta necessitate causatam favorabiliter excusatam habere dignemini et his que magister predictus pro me in eminentia throni vestri proponet pium si placet impertientes auditum et in exauditionis gratiam admittentes gratiose velitis concedere postulata cum remediis et gratiis opportunis ut quod possibilitas mea non obtinet benignitatis vestre largitione donetur ut per vestra sanctitatis subsidium ecclesiam mihi commissam facilius reparare queam ac favente Domino conservare de cetero ne sic ruat necnon et sancte sedi Apostolice exhibere me gratum sicut teneor in futurum Conservet [vos] in vestre ecclesie et potestatis salutem Deus per tempora longeva Data apud Hampton Episcopi juxta Warewik viij kalendas Aprilis anno gratie MCC septuagesimo