Charter Document - 06480008
| Charter Number: | 06480008 |
|---|---|
| Cartulary Title: | Historical papers and letters from the Northern Registers [York] |
| Charter Language: | Latin |
| Charter Origin: | Royal |
| Charter Type(s): | Decree |
| Date: | 1267 |
| Date type: | Internal, Calendar, Regnal |
| Resource Link(s): |
Borthwick Institute - Register 9b (f662v) |
Charter:
H[enricus] Dei gratia rex Anglie dominus Hibernie et dux Aquitanie omnibus ad quos presentes litere pervenerint salutem Cum terre et tenementa inimicorum et rebellium nostrorum qui Simoni de Montefforti quondam comiti Leycestrie et fautoribus suis inimicis nostris tempore guerre que nuper in regno nostro mota fuit per ipsum Simonem ad exheredationem nostram et destructionem corone nostre adheserunt et que sunt de feodis magnatum ejusdem regni per foris facturam dictorum inimicorum nostrorum de communi consensu et consilio eorundem magnatum ac fidelium regni nostri ad nostram ordinationem et dispositionem hac vice pertineant salvis capitalibus dominis homagiis et servitiis suis inde debitis et consuetis ac nos secundum ordinationem et dispositionem predictas quasdam terras et tenementa inimicorum nostrorum que sunt de feodo venerabilis patris W[alterus] Eboracensis archiepiscopi Anglie primatis in comitatu Eboracensi Notingham et Gloucestre quibusdam fidelibus nostris contulerimus volumus et concedimus pro nobis et heredibus nostris quod occasione alicujus concessionis nostre de terris et tenementis que sunt de feodis predicti archiepiscopi occasione predicta aliquibus factis nihil eidem archiepiscopo vel successoribus suis in wardis releviis aut rebus aliis ad eos pertinentibus depereat inperpetuum aut eis propter hoc prejudicium generetur salvis nobis et heredibus nostris his que ad nos secundum regni nostri consuetudinem pertinent ratione terrarum et tenementorum que de nobis tenentur in capite In cujus rei testimonium has literas nostras fieri fecimus patentes Teste meipso apud Merlebergh xviij die Novembris anno regni nostri lij