Charter Document - 06480002

Viris venerabilibus et amicis suis in Christo carissimis magistris Universitatis Grantebr W primas [] salutem in Domino Universitatem vestram que nos in tenera nutrivit etate brachiis sincere caritatis amplectimur et ideo vestris precibus in his que congruunt honestati et valent nobis mediantibus expediri parati sumus et erimus assensum benevolum impertiri dum tamen nostra non ledatur honestas nec juri alterius in aliquo derogetur Sane dilectus in Christo filius magister Johannes de Asgerby vestre Universitatis cancellarius contra provisionem quam de ecclesia de Kirkeby in Kendal auctoritate Apostolica fecimus [de qua provisione admirari non debent qui audiunt cum usi sumus data nobis desuper potestate nisi forte de illis existant qui de omnibus satagunt admirari et dubitare de singulis non reputant inutile ut admirando et dubitando philosophie possint secreta rimari] quasdam rationes in scriptis nuper London proposuit coram nobis Et quia dilectus in Christo filius magister Adam de Northfouk cui ecclesiam contulimus antedictam in remotis partibus tunc agebat nec decuit quicquam super hoc in ejus absentia renovare dicto magistro Johanni gratiose concessimus ut ad nos certo termino pro sua voluntate rediret et nos auditis hinc inde propositis jus utriusque partis absque judici ariorum strepitu librare tanto moderamine curaremus quod Domino juvante cessaret omnis materia murmuris et querele Ad quem terminum super quo et specialius certificari poterit per presentium portitorem si ad nos venire voluerit paratos nos inveniet ad exhibendum sibi justitie complementum Et si ostendere poterit nos in aliquo juste legis tramitem non servasse illud curabimus quantum in nobis est protinus emendare Quod si per aliam viam duxerit ambulare et velut gigas gemine scientie ad iter accinxerat se longinquum et ob hoc ipsum deserere vos contingat nostra non erit iniquitas nec nobis ascribi poterit ad peccatum Postremo noveritis nos aliquantulum admirari de eo quod in directa nobis vestra epistola asserere voluistis commissam nobis a sede Apostolica potestatem mortuo mandatore re integra exspirasse quoniam si hoc ex eo vultis concludere quod ecclesia post mortem mandatoris vacasse dinoscitur vel quia illam post mortem ipsius contulimus utrum consequentia de jure teneat suppositis quibusdam que vos latent et in facto consistunt poterit in dubium merito revocari Preterea licet transcripta que vidimus si respiciantur interius factum nostrum vix contingant in aliquo quia psalterium in multis discordat a cithara hec tamen et alia que predictus magister Johannes pro jure suo dicere poterit et voluerit sibi cupimus usquequaquam servari Valete