Charter Document - 06463067

In nomine domini amen Cum nos Antonius permissione divina Dunelmensis episcopus intendentes visitacionis officium in ecclesia nostra Dunelmensi tam in capite quam in membris exercere litteratorie mandaverimus Ricardo priori et conventui nostre ecclesie supradicte citantes eosdem quod occurrerent nobis et interessent personaliter visitacioni nostre in crastino ascensionis domini anno eiusdem Millesimo Trice[nte]simo videlicet tercio decimo kal Junii in capitulo ecclesie nostre predicte suscipere visitacionem nostram in hiis que statum ecclesie supradicte et conventus sive capituli eiusdem contingerent in forma canonica tune parati ulteriusque recipere quod utilitati eiusdem ecclesie et regulari foret conveniens discipline mandantes nihilominus priori nostre ecclesie Dunelmensis predicte quod citaret priores de Fynkall de sacra Insula de Stamford et de Lythum et magistros seu custodes de Jarow et Wermouth et alias com monachos in locis singularibus commorantes ut coram nobis dictis die et loco personaliter comparerent visitacionem nostram huiusmodi in forma canonica ut premittitur suscepturi ac tam supradicti Ricardus prior et conventus ecclesie nostre Dunelmensis quam priores magistri custodes et alii com monachi cellarum et locorum superius expressorum licet coram nobis tune in nostro capitulo personaliter comparerent requisiti tamen et moniti quam pluries quod nostram canonicam visitacionem iuxta formam citacionis et certificacionis per eosdem emo legatarum et approbatorum necnon iuxta formam canonicam consuetam et regularem disciplinam reciperent ipsam visitacionem canonice eis oblatam subire et suscipere contempserunt et expresse recusarunt a nobis contumaciter inobedienter et contemptibiliter recedendo dicte visitacionis nostre officium per diversas machinaciones et subterfugia monicionum nostrarum et sentenciarum excommunicacionis in inpedientes visitacione ipsam prolatarum non in gnari non absque nota transgressionis canonum et obediencie necnon in nostre iurisdiccionis et libertatis dicte nostre ecclesie lesionem preiudicium et contemptum et scandalum plurimorum presumpserunt temere et dampnabiliter impedire Unde considerantes quod parum prodesset humilibus obediencia nisi obesset contumacibus contemptus et culpam esse in talibus relaxare vindictam nos cum apostolo volentes omnem inobedienciam contumaciam et contemptum ulcisci dictum Ricardum priorem ecclesie nostre predicte eiusdem ecclesie subpriorem tercium priorem sacristam precentorem celerarium terrarium hostillarium camerarium bursarium granatarium refectorarium et fratres Johannem de Castro Bernardi Galfridum de Bordon Robertum de Routhbery com monachos dicte domus contumaciam contemptum et inobedienciam manifestam et transgressionem canonum contraxisse ac eciam iurium et libertatum dicte ecclesie nostre violatores extitisse et existere et in sentencias excommunicacionum per nos latas in impedientes visitacionem nostram dampnabiliter incidisse in hiis scriptis pronunciamus decernimus et eciam declaramus ac dictos omnes et singulos canonica monicione premissa in hiis scriptis nihilominus pro huiusmodi commissis excommunicamus et excommunicatos esse pronunciamus et declaramus decernentes easdem sentencias debite execucioni fore denunciandas penas alias condignas eis et eorum cuilibet in hac parte infligendas prout exigit qualitas excessuum predictorum et aliorum nostre voluntatis arbitrio reservantes Insuper conventum nostre ecclesie Dunolmensis Priores de sacra Insula de Fynkall de Stamford de Lythum ac magistros et custodes de Jarow et Weremouth et alias administratores locorum eorundem contumaces in hiis scriptis pronunciamus ex causis supradictis penam eis canonicam infligendam nobis et nostris commissariis reservantes potestate addendi corrigendi subtrahendi nobis semper salva Acta fuerunt hec que supradixi in capitulo Dunelmensi ut est dictum anno indiccione die mense predictis presentibus venerabili patre fratre Hugone episcopo Bibliensi et discretis viris magistris Willelmo de sancto Botulpho archidiacono Dunelmensi Reginaldo de Brandon canonico ecclesie sancti Pauli London Adam de Duffeld canonico ecclesie Pontiselandi Roberto de Abberwyk decano ecclesie de Aukland Alano de Esyngwald rectore ecclesie de Ryton dominis Petro de Thoresby magistro hospitalis de Kepyere Willelmo de Insula magistro hospitalis de Shirburn Hugone de Boulton rectore ecclesie de Brauncepath Dunelmensis dioecesis et Ricardo de Ganyo notario et aliis testibus in multitudine numerosa Et ego Adam filius Ade de Skyme de Botelich dictus de Lyndeseya Lincolniensis dioecesis apostolica et imperiali auctoritate notarius publicus premissis interfui cum testibus subscriptis et ea vidi et audivi ipsaque scripsi publicavi et in hanc formam publicam redegi rogatus