Charter Document - 06461084

In dei nomine amen Constitutus in presencia vestra reverende pater domine Antonie dei gracia Dunelmensis Episcope ego Ricardus de Toppeclyve sacerdos rector ecclesie de Gretham vestre dioecesis per vos alias admissus et institutus in eadem ad presentacionem discreti viri domini Thome de Leuesham magistri et fratrum hospitalis de Gretham verorum eiusdem ecclesie patronorum prospiciens veraciter et intelligens quod bone memorie Robertos de Stychehill quondam Dunelmensis episcopus ecclesiam de Gretham predictam cedente vel decedente magistro Mauricio clerico qui tunc ipsam tenuit de consensu capituli ecclesie Dunolmensis magistro et fratribus hospitalis de Gretham pro hospitalitate inibi commodius sustinenda in proprios usus concessit convertendam nolens tam pium patris propositum ad tantum bonum dispositum impedire omni iuri quod in dicta ecclesia ex presentacione seu institucione predictis aliove modo quocumque habeo vel habere potero habui vel habere potui renuncio ipsamque ecclesiam et omne ius quod in ea habere potero vel potui in vestras manus reverendas pure sponte libere simpliciter et absolute resigno per presentes volens quantum in me est et consenciens per hec scripta quod dicta ecclesia ordinacione paternitatis vestre provida dictis magistro et fratribus in proprios usus perpetuo possidenda conferatur Cupientes igitur Christi misterium et ipsius ministrorum numerum in dicta hospitali ad eius laudem et honorem augmentari prout in ordinacione super numero capellanorum et clericorum in dicta hospitali deo perpetuo serviendorum ampliando per nos facienda plenius volumus contineri advertentes eciam quod ex hoc non decrescit set accrescit in ecclesia dei Christi famulatus ad quod ex debito cure pastoralis astringimur et tenemur dignumque esse iudicantes ut qui ecclesie deserviunt de ecclesie proventibus foveantur nos pium animi predecessoris nostri propositum quem in hac parte gessit mentis oculis intuentes que in honorem dei et gloriose matris eius ac reverentissimi patroni nostri beati Cuthberti per ipsum predecessorem nostrum tam pie tam laudabiliter gesta sunt ac disposita perficere ac implere volentes In nomine Patris et Filii et Spiritus Sancti amen Memoratam ecclesiam parochialem de Gretham ut predicitur vacantem cum omnibus iuribus reditibus fructibus proventibus exitibus ac aliis suis pertinenciis universis de expresso consensu magistri et fratrum hospitalis predicti verorum patronorum ecclesie prelibate ac eciam prefati domini Ricardi nuper imi rectoris eiusdem prefatis magistro et fratribus ac hospitali predicto pro ipsorum sustentacionis competentis exhibicione perpetua ut secundum formam et tenorem ac modum ordinacionis prefati predecessoris nostri super hiis edite ac ordinacionis nostre subsequenter super hiis faciende divinis insistant obsequiis assignamus appropriamus unimus et annectimus per presentes in usus proprios perpetuo possidendam reservata nobis potestate perpetuam inibi vicariam ordinandi et eidem in certis dicte ecclesie proventibus certam porcionem taxandi pro ipsius ecclesie cura continue peragenda ac aliis eiusdem vicarie oneribus congrue supportandis ita scilicet quod magister et fratres predicti qui pro tempore fuerint ad dictam vicariam nunc et alias cum vacaverit infra tempus legitimum nobis et successoribus nostris presentent personam ydoneam et honestam per nos in eadem instituendam auctoritate dioecesana in omnibus semper salva In quorum omnium testimonium presens instrumentum publicum per Ricardum de Ganyo clericum notarium nostrum infrascriptum scribi fecimus et publicari nostrique sigilli appensione muniri Acta et data apud Gretham vicesimo die mensis Junii anno domini Millesimo CCC tercio indiccione prima presentibus venerabili patre fratre Hugone dei gracia episcopo Bibliensi dominis Rogero de Waltham canonico ecclesie prebendialis de Derlington Ricardo de Haneden perpetuo vicario ecclesie de Heyhyngton Thoma de Cantuaria capellanis dominis Hugone de Paunton et Achibaldo de Breton militibus Willelmo de Ergum et aliis testibus ad premissa vocatis specialiter et rogatis