Charter Document - 06461070

In Dei nomine amen Cum reverendus pater dominus Antonius dei gracia episcopus Dunelmensis ecclesiam suam Dunelmensem et suum ipsius ecclesie capitulum tam in capite quam in membris ex officio et ordinario iure intendens visitare ac reformare et corrigere que fuerunt corrigenda et eciam reformanda certum diem videlicet in crastino ascensionis domini anno eiusdem Millesimo tricentesimo scilicet tercio decimo kal Junii ad suam exercendam visitacionem predictam in capitulo Dunelmensi cum continuacione et prorogacione dierum statuit et assignavit Ricardo priori et eiusdem ecclesie conventui litteratorie mandando in virtute obediencie qua eidem patri indubitanter essent astricti omnes et singulos iuxta formam citacion is eosdem nihilominus peremptorio citando quod dictis die et loco sibi in forma debita occurrerent ac visitacioni sue secum personaliter interessent visitacionem huiusmodi in forma canonica subire et suscipere tunc parati et actualiter suscepturi mandans insuper dicta priori quod citaret seu citari faceret priores de Fynkall et Insula sacra de Stamford et de Lythum ac magistros seu custodes de Jarow et de Wermouth aliosque com monachos in locis singularibus commorantes quod dictis die et loco coram ipso comparerent in forma supradictis priori et conventui ecclesie sue Dunelmensis expressa superius eciam et assignata qui moniciones mandata et citaciones huiusmodi acceptarunt prout ex literis certificatoriis eorundem plenius poterit apparere cumque dictus reverendus pater inchoato per eum dicte visitacionis sue officio ex causis legitimis prepeditus procedere ulterius ea vice in eadem personaliter non valeret nobis Johanni de Lascy cancellario ecclesie Cicestrensis et Roberto decano de Aukland Dunelmensis dioecesis vices suas sub certa forma commisit prout in literis commissionis huiusmodi nobis inde factis plenius continetur nos ergo huiusmodi mandatum recipientes et in huiusmodi negocio nobis commisso legitime ex manifesto et notorio et per viam manifesti et notorii procedentes quia rimatis rimandis consideratis considerandis et ponderatis ponderandis per viam antedictam invenimus predictum Ricardum priorem manifeste et notorie obedienciam et votum obediencie notorie infregisse periurum religionis sue contemptorem canonum transgressorem ordinis sui prevaricatorem ab observancia et effectu sue religionis et discipline regularis exorbitantem iurium et libertatum ecclesie Dunelmensis cui per iuramentum est astrictus notorium et manifestum violatorem In nomine patris et filii et spiritus sancti amen Eundem Ricardum priorem ipsius absencia dei repleta presencia auctoritate dicti domini episcopi Dunelmensis qua fungimur in hac parte dicto prioratu ecclesie predicte Dunelmensis cum omnibus proventibus obvencionibus et iuribus et pertinenciis suis in hiis scriptis sentencialiter et diffinitive privamus et privatum esse declaramus et a regimine prioratus ac administracione temporalium et spiritualium eiusdem amovemus omnes et singulos monachos capituli Dunelmensis ibi vel alibi ubicumque commorantes ab ipsius obediencia penitus absolventes Inhibemus eciam eisdem sub pena excommunicacionis ne eidem Ricardo ut Priori in aliquo obediant vel intendant Thomam de Novo Castro subpriorem Galfridum de Burdon sacristam Ricardum de Kellawe tercium priorem Thomam de Aldewod camerarium Johannem de Seleby hostilarium Johannem de Wlveston seniorem granatarium Rogerum de Stanhope celerarium Willelmum de Daltone refectorarium Walterum de Egisclive precentorem et Robertum de Routhbery custodem sigilli quos prefatus reverendus pater in crastino ascensionis domini anno domini Millesimo tricentesimo in capitulo Dunelmensi excommunicavit in scriptis propter eorum contemptum et contumaciam manifestam ipsos et eorum quemlibet ab officiis et eorum administracione in hiis scriptis ammovemus Johannem de Castro Bernardi Galfridum de Castro et Nicholaum de Routhbery Johannem de Appelby Johannem de Wolvestone iuniorem et Ricardum de Brunton quos reverendus pater dictus episcopus Dunelmensis in crastino ascensionis domini anno ut supra pronunciavit contumaces penam eis infligendam sibi vel commissariis suis reservando qui in dicta contumacia adhuc animo persistunt indurato in hiis scriptis excommunicamus et excommunicatos publice nunciamus auctoritate dicti domini episcopi