Charter Document - 06460158

Edwardus dei gracia Rex Anglie Dominus Hibernie et Dux Aquitanie venerabili in Christo patri A eadem gracia Patriarche Jerosolimitano et Episcopo Dunelmensi salutem Cum pluries vobis mandaverimus quod audita querela Alani de Tesdale super diversis capcionibus et iniustis detencionibus averiorum ipsius Alani et aliis gravaminibus et iniuriis sibi infra libertatem vestram Dunolmensem per ballivos et ministros vestros libertatis illius et alios de eadem libertate ut dicitur multipliciter illatis eidem Alano inde fieri faceretis debitum et festinum iusticie complementum ne pro defectu iusticie in hac parte querela ad nos perveniret iterata per quod manum ad hoc in vestri defectum apponere deberemus vel causam nobis significaretis quare mandatis nostris predictis minime paruistis ac vos spretis mandatis nostris vobis inde directis ut accepimus eidem Alano de predictis gravaminibus iusticiam facere seu causam quare id facere noluistis vel non debuistis nobis significare hactenus distuleritis in nostri ac mandatorum nostrorum predictorum contemptum manifestum et predicti Alani grave dampnum de quo plurime admiramur vobis iterato mandamus firmiter iniungentes quod audita querela predicti Alani de gravaminibus et iniustis detencionibus predictis eidem Alano debitum et festinum iusticie complementum inde fieri faciatis iuxta tenorem priorum mandatorum nostrorum vobis inde directorum ne in vestri defectum oporteat nos eidem Alano de alio remedio providere Et de hoc quod inde duxeritis faciendum nos sub sigillo vestro distincte et aperte sine dilacione reddatis certiores hoc breve nobis remittentes Teste me ipso apud Westmonasterium xii die Julii anno regni nostri quarto