Charter Document - 06460155
| Charter Number: | 06460155 |
|---|---|
| Cartulary Title: | The Records of Antony Bek. Bishop and Patriarch 1283-1311 |
| Charter Language: | Latin |
| Charter Origin: | Religious |
| Charter Type(s): | Indulgence |
| Date: | 1310 |
| Date type: | Internal, A.D., Calendar, Episcopal |
| Resource Link(s): |
|
Charter:
Universis sancte matris ecclesie filiis presentes litteras inspecturis Antonius permissione divina sancte Jerosolomitane ecclesie patriarcha et episcopus Dunolmensis salutem in eo qui pro redempcione humani generis Jerosolimis voluit crucifigi Gratum deo impendere credimus obsequium ipsumque creatorem et dominum omnium precipue veneramur dum sanctos suos devote Christianorum memorie recommendamus eoque prestancius quo per allectiva indulgenciarum et remissionum munera ad oracionis devocionem et elemosinarum largicionem animos fidelium excitamus De dei igitur omnipotentis misericordia gloriose virginis Marie matris eius sanctorum apostolorum Petri et Pauli et beatissimi Cuthberti confessoris omniumque sanctorum meritis et precibus confidentes omnibus Christi fidelibus de peccatis suis vere penitentibus et confessis qui causa devocionis et oracionis ad Cathedralem Ecclesiam nostram Dunolmensem accesserint et feretrum beatissimi Cuthberti confessoris aliasque reliquias ibidem in quacumque parte dicte Ecclesie existentes visitaverint seu de bonis sibi a deo collatis aliquid eidem Ecclesie offerendo seu alio modo largiendo caritative contulerint quadraginta dies auctoritate nostra patriarchali et rursum quadraginta dies iure nostro episcopali de iniuncta sibi penitencia misericorditer in domino relaxamus Ratificantes insuper per presentes omnes indulgencias a confratribus nostris archiepiscopis et episcopis quibuscumque ex causis premissis concessas et imposterum concedendas In cuius rei testimonium sigillum nostrum presentibus est appensum Dat apud Eltham Roffensis dioecesis quinto die mensis Junii anno domini Millesimo Trecentesimo Decimo patriarchatus nostri quinto et consecracionis nostre vicesimo septimo