Charter Document - 06460153

Antonius permissione divina sancte Jerosolomitane ecclesie patriarcha et episcopus Dunolmensis dilectis in Christo filiis [] priori de Tynemuth ordinis sancti Benedicti magistro Thome de Clyfford decano ecclesie prebendalis de Aukeland nostre dioecesis Dunolmensis ac domino Rogero de Waltham et magistro Roberto de Baldok London ecclesie canonicis salutem graciam et benediccionem Cum nos in visitacione nostra ultima ex officii nostri pastoralis debito in Monasterio nostro Dunolmensi non diu est in capite et membris in personis et rebus ut convenit celebrata invenerimus nonnullos eiusdem Monasterii nostri monachos varias suspensionum et excommunicationum sentencias tam propter contumacias contemptus rebelliones et offensas per ipsos clam et palam contra nos et nostram iurisdictionem in alia visitatione nostra prius iam diu est in prefato Monasterio nostro inchoata non admittendo nos ad eamdem nosque quominus ipsam exercere potuimus ut debuimus et prout incumbebat contemptibiliter inpediendo quam eciam propter alias transgressiones et culpas temere contractas quosdam illorum in specie alios vero in genere plures eciam illorum in genere et specie per nos latas incurrisse aliisque criminibus delictis excessibus culpis et maculis involutos fuisse et esse conspersos quorum aliquos a dictis sentenciis nuperrime absolvimus in forma iuris de nostra gracia speciali pena ipsis infligenda nobis reservata cumque alia invenerimus in nostra visitatione predicta que plurimum correctione indigent et reformatione condigna quorum expedicioni ad presens personaliter vacare non valemus vobis de quorum industria et circumspectione firmam in domino fiduciam optinemus ad corrigendum et reformandum tam in personis quam in rebus defectus et crimina in nostra predicta visitatione comperta secundum formam retroactorum per nos et nostros alios commissarios super hiis habitorum procedendum culpas et offensas contra nos per quoscumque dicti Monasterii nostri monachos contractas et specialiter illas propter quas plurimi eiusdem Monasterii monachi per [] Abbatem Lesatensem executorem a sede apostolica deputatum et eius auctoritate eo quod nos ad administrationem bonorum spiritualium et temporalium dicti Monasterii Dunolmensis prout ab eadem sede commissum nobis extitit nullatenus admiserunt excommunicationis sentencia fuerant et sunt involuti aliasque quascumque quantum ad nos attinet remittendum monachis ipsis nomine nostro et pro nobis prout vestro arbitrio melius videbitur faciendum monachos eciam dicti Monasterii quoscumque a suspensionum et excommunicationum predictarum ac aliis quibuscumque sentenciis per nos seu nostra auctoritate ordinaria per quemcumque involutos et per nos prius non absolutos et similiter quorum absolutionem alias reservavimus nobis ipsis dum tamen status sui reformationem in forma debita humiliter postulaverint ut convenit et devote absolvendum penas canonicas et penitencias salutares monachis ipsis tam per nos absolutis quorum penas reservavimus nobis ipsis quam per vos absolvendis aliisque quos culpabiles inveneritis pro modo culpe et qualitate delicti inponendum et iniungendum eciam usque ad amotionem si culpe gravitas hoc exegerit penas ac penitencias pronunciandum ipsas aggravandum et mitigandum diffiniendum exequendum actum visitationis nostre predicte continuandum expediendum et finaliter ac effectualiter terminandum ac omnia et singula faciendum que circa huiusmodi reformationem morum et correctionem tam personarum quam rerum ac ad huiusmodi finalem negocii expedicionem necessaria fuerint sive oportuna et que in premissis et circa ea requiruntur eciam quantumcumque mandatum exigant speciale vices nostras committimus per presentes cum cuiuslibet canonice cohercionis potestate donec eas duxerimus revocandas Quod si non omnes hiis exequendis interfuistis tres aut duo vestrum quos ibidem presentes esse contigerit aliis minime expectatis omnia premissa et singula diligenter nihilominus exequantur Mandamus insuper per presentes dilectis filiis [] priori et capitulo nostro Dunolmensi ac omnibus et singulis dicti Monasterii nostri monachis aliisque nostris subditis et subiectis in virtute sancte obediencie et sub pena canonice districtionis ipsis eciam per vos tres aut duos vestrum prout et quando opus fuerit monitione premissa canonica inponende quatenus vobis in premissis reverenter pareant et intendant Volumus eciam quod in premissorum executione dilectos filios priorem nostrum Dunolmensem fratrem Henricum de Stanford subpriorem ac alios duos vel tres dicti capituli Dunolmensis monachos de quibus prout et quando vobis tribus aut duobus vestrum magis videbitur oportunum assessores et coadiutores vobis assumatis In cuius rei testimonium has literas nostras vobis fieri fecimus patentes sigillo nostro consignatas Dat apud Aluerton xiii die mensis Maii anno domini Millesimo Trecentesimo decimo patriarchatus nostri quinto et consecracionis nostre vicesimo septimo