Charter Document - 06460132
| Charter Number: | 06460132 |
|---|---|
| Cartulary Title: | The Records of Antony Bek. Bishop and Patriarch 1283-1311 |
| Charter Language: | Latin |
| Charter Origin: | Religious |
| Charter Type(s): | Notification |
| Date: | 1308 |
| Date type: | Internal, A.D., Calendar, Episcopal |
| Resource Link(s): |
Durham Cathedral Archive - Cartulary I (f95r) |
Charter:
Antonius permissione divina sancte Jerosolomitane ecclesie Patriarcha et Episcopus Dunolmensis dilectis in Christo filiis Priori et conventui ecclesie nostre Dunolmensis salutem graciam et benediccionem Quia in crastino Purificacionis beate Marie virginis proximo futuro intendimus annuente domino ad ecclesiam nostram Dunolmensem antedictam accedere officium visitacionis tam in capite quam in membris in personis et rebus prout ius exigit et nobis incumbit ex officio diligenter impensuri volentes vos ut decet super hoc legitime premuniri vobis omnibus et singulis in virtute obediencie firmiter iniungendo mandamus quatenus dicto die hora competenti cum continuacione et prorogacione dierum ut opus fuerit in capitulo ecclesie nostre Dunolmensis supradicte nobis in forma debita occurratis et huiusmodi visitacioni nostre una nobiscum personaliter intersitis ipsam visitacionem nostram in hiis que statum vestrum et ecclesie nostre Dunolmensis predicte contingunt ibidem subire et suscipere in forma canonica tunc parati et actualiter suscepturi ulteriusque facturi et recepturi quod canonicum et iustum fuerit ac utilitati eiusdem ecclesie et regulari conveniens videbitur discipline De die vero recepcionis presencium nos absque morose tarditatis dispendio certificetis per vestras patentes litteras harum seriem continentes Bene valete Dat apud Eltham sub sigillo nostro Episcopali duodecima die Mensis Decembris anno domini Millesimo CCC octavo Patriarchatus nostri tercio et consecracionis nostre vicesimo Quinto