Charter Document - 06460127
| Charter Number: | 06460127 |
|---|---|
| Cartulary Title: | The Records of Antony Bek. Bishop and Patriarch 1283-1311 |
| Charter Language: | Latin |
| Charter Origin: | Royal |
| Charter Type(s): | Decree |
| Date: | 1306 |
| Date type: | Internal, Calendar, Regnal |
| Resource Link(s): |
|
Charter:
Edwardus dei gracia Rex Anglie Dominus Hibernie et Dux Aquitanie venerabili in Christo patri Antonio eadem gracia Episcopo Dunelmensi salutem Monstravit nobis Johannes filius Johannis de Dunelmo quod Ricardus de Stanelawe vicecomes vester Episcopatus predicti et alii ministri vestri ibidem quadraginta libratas terre ipsius Johannis cum pertinenciis in Dunelm Neuton et Herinton infra libertatem vestram Episcopatus predicti nuper in manum vestram absque causa racionabili seisiverunt terram illam adhuc occupando et bona et catalla sua ad valenciam ducentarum librarum ibidem inventa ceperunt et ea ei adhuc detinent in ipsius Johannis dispendium non modicum et exheredacionis periculum manifestum et vos licet per predictum Johannem super excessibus et transgressionibus predictis emendandis pluries fuissetis requisiti emendas tamen aliquas sibi in hac parte facere totaliter recusastis Nos igitur eidem Johanni sicut et aliis de regno nostro in huiusmodi oppressionibus suis subvenire volentes ut tenemur vobis mandamus sicut alias mandavimus quod super excessibus et transgressionibus predictis si perpetrati fuerint debitas et tam celeres emendas prefato Johanni fieri faciatis quod pro defectu iusticie clamor ad nos inde non perveniat iteratus per quod manus ad hoc aliter apponere debeamus vel causam nobis significetis quare mandato nostro alias vobis inde directo minime paruistis Teste me ipso apud Langele iii die Junii anno regni nostri primo