Charter Document - 06460122

Antonius permissione divina sancte Jerosolimitane ecclesie patriarcha et episcopus Dunolmensis Religiosis viris [] Priori et conventui ecclesie de Hexildesham ordinis sancti Augustini Eboracensis dioecesis salutem graciam et benediccionem Licet ex officii pastoralis debito ac paterne compassionis affectu subditorum oppressionibus succurrere teneamur pro vestris tamen incommodis amovendis eo cogitare propensius astringimur quo vos in vinea domini per regulares observancias deo placabiles hospitalitatem honorabilem et alia multiplicia caritatis opera novimus vigilancius laborare Sane ad lamentabilem statum ecclesie vestre ac Monasterii vestri predicti per repentini incendii voraginem iam consumpte necnon et alia loca vestra nonnulla per sevientem Scottorum incursum depredaciones innumeras et hostiles invasiones eorundem multiplices in favillam et cineres proto dolor iam redacta aliis bonis vestris penitus sic consumptis quod ad sustentacionem vestram reparacionem ipsius ecclesie et onera incumbencia facultates quas in presenti habetis sufficere non poterunt ut deceret oculos nostros compassionabiliter dirigentes intimeque pensantes quod ob cotidianum adventum regalis exercitus per nos ac frequentem aliorum superveniencium apud vos in Marchia constitutas concursum undique onerosum hospitalitas vestra que ad premissa minus sufficit plus solito aggravatur inducimur obnixius et artamur ut in tanta necessitate ob celeriorem reparacionem ipsius ecclesie et monasterii vestri decorem cultusque divini augmentum per bonorum temporalium incrementum vobis et ecclesie vestre ac monasterio vestro predicto quatenus sine lesione iuris nostri episcopalis possumus congrue succurramus Habito igitur super hiis tractatu sollempni et diligenti qui in talibus requiritur invocate Christi nomine ecclesiam de Stanfortham parochialem et curatam nostre dioecesis Dunolmensis cuius estis advocati et patroni prout apparet per cartam clare memorie Edwardi nuper regis Anglie vobis inde confectam cuius eciam ecclesie vir discretus dominus Ricardus de Drokenesford rector existit in presenti cum suis iuribus et pertinenciis universis in usus vestros proprios perpetuo habendam tenendam et possidendam ecclesie ac domui vestre predicte vobisque et successoribus vestris ob causas predictas auctoritate pontificali conferimus concedimus donamus et appropriamus per presentes volentes et concedentes ut cedente vel decedente domino Ricardo nunc rectore dicte ecclesie supradicto proprietatem et possessionem eiusdem ecclesie de Stanfortham auctoritate vestra libere ingredi et in usus vestros proprios integraliter retinere valeatis consensu nostro [] minime requisito Vobis nihilominus ex uberioris dono gracie concedentes ut vicariam que alias in dicta ecclesia de Staunfortham sic vobis per nos appropriata cedente vel decedente rectore per nos vel successores nostros esset alias de iure communi ordinanda simul cum dicta ecclesia integraliter cum suis iuribus et pertinenciis universis vobis liceat retinere per vos in vestros usus proprios perpetuo convertendam Ne tamen dicta ecclesia parochialis de Stanfortham debitis obsequiis defraudetur set quod laudabiliter deo serviatur in eadem volumus et ordinamus per hec scripta quod tempore cessionis aut mortis dicti domini Ricardi nunc rectoris ipsius ecclesie de Stanfortham ac alias quandocumque ipsam ecclesiam vacare contigerit per aliquem de concanonicis vestris nobis et successoribus nostris qui pro tempore fuerint per vos presentandum et per nos et successores nostros admittendum et instituendum vicarium in eadem cura dicte ecclesie parochialis diligenter agatur et exerceatur Qui quidem canonicus sic institutus nobis de spiritualibus vobis autem de temporalibus respondebit ac omnia onera dicte vicarie incumbencia sustinebit iure iurisdiccione et auctoritate tam dioecesana quam alia ordinaria quacumque semper salvis In quorum omnium testimonium has litteras nostras manu Ricardi de Ganyo notarii puplici infrascripti scribi et vobis fieri fecimus patentes sigilli nostri patriarchalis cum nostro sigillo episcopali indorsato munimine roboratas Act et Dat apud Somerton secundo die Mensis Octobris anno domini Millesimo Tricentesimo septimo Indiccione vi pontificatus domini Clementis divina providencia pape quinti anno secundo patriarchatus nostri secundo et consecracionis vicesimo quarto presentibus discretis viris domino Stephano de Mauley archidiacono Clivelandie et magistro Johanne de Insula iuris civilis professore canonico Aucland testibus ad premissa vocatis specialiter et rogatis Et ego Ricardus natus quondam Henrici de Ganyo clericus Coventrensis et Lichefeldensis dioecesis apostolica et imperiali auctoritate Notarius puplicus predictis omnibus una cum dictis testibus presens interfui et ea omnia ut supra scribuntur fieri vidi et audivi ipsaque omnia de mandato venerabilis patris domini Antonii dei gracia sancte Jerosolimitane ecclesie patriarche et episcopi Dunolmensis propria manu scripsi rogatus in hanc puplicam formam redegi meumque signum apposui consuetum