Charter Document - 06460120
| Charter Number: | 06460120 |
|---|---|
| Cartulary Title: | The Records of Antony Bek. Bishop and Patriarch 1283-1311 |
| Charter Language: | Latin |
| Charter Origin: | Religious |
| Charter Type(s): | Licence |
| Date: | 1307 |
| Date type: | Internal, A.D., Calendar, Episcopal |
| Resource Link(s): |
Durham Cathedral Archive - Register I (fii32v) |
Charter:
Antonius permissione divina sancte Jerosolomitane ecclesie patriarcha et episcopus Dunelmensis dilectis in Christo filiis [] Priori et Conventui ecclesie cathedralis Karlioliensis salutem graciam et benediccionem Licet ex officii pastoralis debito ac paterne compassionis affectu subditorum oppressionibus succurrere teneamur pro vestris tamen incommodis amovendis eo cogitare propensius astringimur quo vos in vinea domini per regulares observancias deo placabiles hospitalitatem honorabilem et alia multiplicia caritatis opera novimus vigilancius laborare Sane ad lamentabilem statum ecclesie vestre Karlioliensis predicte per repentini incendii voraginem iam consumpte necnon et alia loca vestra nonnulla per sevientem Scottorum incursum depredaciones innumeras et hostiles invasiones eorundem multiplices in favillam et cineres prodolor iam redacta aliis bonis vestris penitus sic consumptis quod ad sustentacionem vestram reparacionem ipsius ecclesie et onera incumbencia facultates quas in presenti habetis sufficere non poterunt ut deceret oculos nostros compassionabiliter dirigentes intimeque pensantes quod ob cotidianum adventum regalis exercitus per nos ac frequentem aliorum superveniencium concursum onerosum vestra hospitalitas que ad premissa minus sufficit plus solito aggravatur inducimur obnixius et artamur ut in tanta necessitate ob celeriorem reparacionem ipsius ecclesie sustentationumque vestram per bonorum temporalium incrementum vobis et ecclesie vestre iam dicte quatenus possimus congrue succurramus Invocato igitur Christi nomine medietatem ecclesie de Quitingham nostre dyoecesis Dunolmensis cuius rector dominus Johannes de Kirkeby esse dinoscitur in presenti cum omnibus suis iuribus et pertinenciis in usus vestros proprios possidendam ob causas predictas ecclesie vestre predicte vobisque et successoribus vestris conferimus concedimus auctoritate pontificali specialiter donamus et appropriamus perpetualiter per presentes volentes et concedentes ut cedente vel decedente domino Johanne de Kirkeby ipsius medietatis nunc rectore prefato possessionem et proprietatem eiusdem auctoritate vestra libere ingredi et in usus vestros proprios integraliter retinere valeatis assensu nostro vel successorum nostrorum seu aliorum cuiuscumque sint condicionis vel status minime requisito salva in omnibus vicaria ac eciam iure vicarii et vicarie prout in aliis ecclesiarum appropriacionibus est hactenus fieri consuetum Confirmamus insuper et ratificamus per presentes appropriacionem de alia medietate ecclesie de Quitingham sepe fate prout vobis rite et canonice per predecessores nostros facta fuit In quorum premissorum omnium et singulorum testimonium has litteras nostras fieri fecimus patentes sigilli nostri patriarchalis cum sigillo nostro episcopali indorsato munimine roboratas Dat Karleol vicesimo nono die mensis Julii anno domini millesimo tricentesimo septimo patriarchatus nostri secundo et consecracionis nostre vicesimo quarto