Charter Document - 06460112
| Charter Number: | 06460112 |
|---|---|
| Cartulary Title: | The Records of Antony Bek. Bishop and Patriarch 1283-1311 |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1306 |
| Date type: | Internal, Calendar, Papal |
| Resource Link(s): |
|
Charter:
Clemens Episcopus servus servorum dei venerabili fratri Antonio Patriarche Jerosolimitano ac Dunolmensi Episcopo salutem et apostolicam benediccionem Ad audienciam nostram fama publica deferente pervenit quod Ricardus de Hoton qui pro Priore Dunolmensi se gerit religionis abiecta modestia diversis est criminibus irretitus inter cetera bona Prioratus monasterii Dunolmensis tam spiritualia quam temporalia dilapidavit et adhuc dilapidat et consumit sic prodigialiter quod in eodem monasterio quod pre aliis monasteriis regni Anglie clarere religione et affluere rerum abundancia consuevit religionis observancia pro fugata sublata hospitalitas et elemosina in tantum defraudata noscuntur quod nisi ei celeri remedio succurratur vix adiceret ut resurgat Propter quod nos hoc nolentes sicuti nec debuimus coniventibus oculis pertransire eundem Ricardum ab administracione bonorum spiritualium et temporalium dicti Prioratus duximus suspendendum ac de tue circumspeccionis industria plenam in domino fiduciam optinentes fraternitati tue administracionem et curam Prioratus eiusdem tam in spiritualibus quam in temporalibus presenti auctoritate committimus per te vel alium seu alios usque ad apostolice sedis beneplacitum exercendas Quocirca fraternitati tue per apostolica scripta mandamus quatinus curam et administracionem huiusmodi sic prudenter sicque utiliter studeas exercere quod idem Prioratus sub tua cura refloreat et optato restauracionis patrocinio pociatur tuque preter divine retribucionis premium nostram et apostolice sedis graciam exinde consequi uberius merearis Dat apud Sanctum Ciricum prope Lugdon iii Non Martii Pontificatus nostri anno primo