Charter Document - 06460090
| Charter Number: | 06460090 |
|---|---|
| Cartulary Title: | The Records of Antony Bek. Bishop and Patriarch 1283-1311 |
| Charter Language: | Latin |
| Charter Origin: | Religious |
| Charter Type(s): | Institution |
| Date: | 1303 |
| Date type: | Internal, A.D., Calendar, Episcopal |
| Resource Link(s): |
|
Charter:
Universis sancte matris ecclesie filiis ad quorum noticiam pervenerit hec scriptura Antonius permissione divina Dunelmensis episcopus salutem in eo qui est omnium vera salus Cum sanctissimus pater dominus Bonifacius divina providencia papa octavus ecclesiam de Ponteland nostre dyoecesis custodi scolaribus et fratribus domi de Merton Oxonie in proprios usus habendam nu perime contulisset porcione tamen vicario in eadem instituendo debita reservata de qua ex officii nostri debito nobis incumbit propensius ordinare ne ecclesia predicta debitis defraudetur obsequiis importune quinimmo cultus divinus in eadem ut cupimus augmentetur ea propter decernimus et pronunciamus vicarium in ecclesia de Ponteland sepe dicta per nos ad ipsam admittendum et instituendum ut convenit in eadem debere personaliter decetero iuxta constitucionem legati super hoc editam residere Cuius quidem vicarii qui pro tempore fuerit porcionem habendam et percipiendam nomine vicarie sue ipsamque vicariam consideratis ad plenum tam facultatibus quam eciam oneribus ecclesie memorate inquisicioneque habita diligenti de eisdem ordinamus et taxamus in rebus et particulis debere consistere infrascriptis videlicet in decimis lini feni canabis curtilagiorum molendinorum herbagii cimiterii et aliorum locorum aucarum columbarum gallinarum annuatim apium vitulorum pullanorum porcellorum albi et albuminis piscarie et aliis decimis provenientibus ex negotiacione vel artificio quibuscunque item in percepcione panis benedicti oblacionum quarumcunque voluntariarum debitarum et consuetarum ac aliarum obvencionum tam ex e sponsalibus quam ex reconciliacionibus baptisteriis purificacionibus et aliis proventibus mortuariis et ceragiis proveniencium infra limites et loca decimacionum parochie ecclesie de Ponteland antedicte exceptis decimis maioribus et minoribus de manerio de Horton de Scheppecotes et Petecotes qui sunt abbatis Novi Monasterii provenientibus Habebit insuper vicarius qui pro tempore fuerit pro se et vicaria sua duas partes septies viginti acrarum dominice terre arabilis et duas partes prati cum frussura adiacente ad duas partes terre et cum duabus partibus bercarie inibi situate ad dictam ecclesiam de Ponteland spectantes et terciam partem petarie pro focale Habebit eciam terram cum prato spectantem ad capellam de Mylleneburn et parvam aream iacentem in villa de Ponteland inter aquas iuxta domum Radulphi fabri Ita quod de fructibus provenientibus de quibuscunque terris locis aut rebus aliis ipsius vicarie quibuscunque superius assignatis eidem infra dictam parochiam existentibus aliquas decimas maiores vel minores rectoribus non persolvet nec eciam rectores aliquas decimas vicario solvere teneantur Assignavimus insuper eidem vicario de consensu expresso procuratoris dictorum custodis scolarium et fratrum totum mansum cum superedificatis in villa de Ponteland situm quondam porcioni domini Philippi de Wyleby quam in eadem habuit ecclesia deputatum Volumus eciam quod vicarius qui pro tempore fuerit omnia onera ordinaria dicte ecclesie sustineat et supportet extraordinaria vero pro rata sue porcionis subeat ut tenetur proviso quod omnes decime fructus et redditus dicte ecclesie superius non expressi dictis custodi scolaribus et fratribus integraliter reserventur Et ut hec nostre ordinatio stabilis et inconcussa permaneat in futuro eandem fecimus sigilli nostri munimine roborari Act et dat apud Castrum Bernardi tricesimo primo die mensis Augusti anno domini millesimo trecentesimo tercio et consecracionis nostre vicesimo