Charter Document - 06460027

Antonius permissione divina Dunelmensis Episcopus dilecto in Christo filio Priori suo Dunelmensi salutem graciam et benediccionem De vestre circumspecte discrecionis industria ac note probitatis vestre meritis plenam et sinceram in domino fiduciam optinentes ad proponendum predicandum iniungendum et exequendum publice auctoritate et vice nostra nobis ab apostolica sede in hac parte commissa vivifice crucis ministerium omnibus parochianis et subditis nostris per totam nostram dioecesim Dunelmensem constitutis ac ad exhortandum et inducendum eosdem efficaciter ut predicte crucis signum devote suscipiant et publice deferant et in proximo passagio generali ad terre sancte succursum se preparent transfretare ad concedendum insuper venerabile signum sancte crucis cunctis devote petentibus quibus dominus inspirabit ac ad convocandum populos propter hoc ad certa et ydonea loca quociens expedire videritis et ad indulgencias audientibus predicaciones vestras iuxta formam litterarum apostolicarum concedendum ac absolvendum in forma ecclesie et dispensandum in casibus in predictis litteris comprehensis cum recipientibus de manibus vestris crucem sanctam ac eciam ad exponendum et notificandum populis indulta et privilegia crucesignatis ab apostolica sede concessa prout in ipsis litteris apostolicis continentur et ad prosequendum faciendum et complendum finaliter omnia et singub que in tam pio negocio et ipsius expedicione necessario vel utiliter requiruntur secundum formam continenciam et effectum mandati apostolici cuius copiam vobis faciet decanus ecclesie de Cestre quem ad presens negocium pariter exequendum per litteras nostras alias deputavimus vobis tenore presencium committimus vices nostras Dat apud Aukeland in crastino animarum anno domini MCC Nonagesimo primo et consecracionis nostre Octavo