Charter Document - 06460017
| Charter Number: | 06460017 |
|---|---|
| Cartulary Title: | The Records of Antony Bek. Bishop and Patriarch 1283-1311 |
| Charter Language: | Latin |
| Charter Origin: | Religious |
| Charter Type(s): | Licence |
| Date: | 1290 |
| Date type: | Internal, A.D., Calendar, Episcopal |
| Resource Link(s): |
Durham Cathedral Archive - Cartulary I (f83v) |
Charter:
Antonius permissione divina Dunelmensis episcopus dilectis in Christo filiis subpriori et conventui ecclesie nostre Dunelmensis salutem graciam et benediccionem Ad presenciam nostram accedentes discreti viri et dilecti in Christo filii fratres Gilbertus de Shireburn et Henricus de Tesdall con monachi vestri ad nos cum vestris litteris patentibus destinati humili nobis ex parte vestra peticione supplicarunt ut cum domus vestra per cessionem dilecti in Christo filii fratris Hugonis de Derlyngton quondam prioris eiusdem sit prioris solacio destituta vobis eligendi priorem licenciam concedere dignaremur Nos igitur affectu paterno vobis compacientes ac vestris precibus benignius annuentes salvis in omnibus que ad nos et successores nostros de iure debuerint pertinere licencie munus vobis concedimus postulate mandantes et diligenter in domino exhortantes quatinus virum ydoneum deo gratum ecclesie necessarium et nobis fidelem et devotum vobis assumere curetis et eligere in priorem ut in ipsius promocione cultus augeatur divinus et ecclesiastica negocia comode procurentur domuique vestre ac patrie pax et tranquillitas favente altissimo preparentur Reservamus eciam nobis liberam et plenam potestatem providendi memorato fratri Hugoni de bonis et proventibus monasterii nostri sicut deo complacere et ecclesie nostre Dunelmensi predicte viderimus expedire Bene valete Dat apud Werk xvii kal Aprilis anno gracie MCC octogesimo nono et consecracionis nostre anno septimo