Charter Document - 06460014
| Charter Number: | 06460014 |
|---|---|
| Cartulary Title: | The Records of Antony Bek. Bishop and Patriarch 1283-1311 |
| Charter Language: | Latin |
| Charter Origin: | Religious |
| Charter Type(s): | Foundation |
| Date: | 1288 |
| Date type: | Internal, A.D., Calendar, Feast, Episcopal |
| Resource Link(s): |
Durham Cathedral Archive - Register I (fii33v) |
Charter:
Universis sancte matris ecclesie filiis ad quos presentes littere pervenerint A permissione divina Dunelmensis episcopus salutem in domino sempiternam Noveritis quod nos ad honorem dei et beatissime matris eiusdem ac divini cultus augmentum damus concedimus et ordinamus pro nobis et successoribus nostris inperpetuum totam illam carucatam terre cum viginti quatuor acris et dimidia in territorio de Norham cum manso principali ad eandem pertinente in eadem villa quam de nobis Ricardus de sancto Oswaldo clericus dictus procurator de Norham in capite tenuit et postea nobis et successoribus nostris reddidit concessit et quietum clamavit de se et heredibus suis vel assignatis inperpetuum cum omnibus suis pertinenciis libertatibus et asiamentis sine aliquo retine mento prout in carta quiete clamacionis quam inde nobis fecit plenius continetur ad inveniendum et sustinendum unum cappellanum qui de beata virgine perpetuis temporibus ad altare omnium sanctorum in ecclesia parochiali de Norham continue celebrabit volentes statuentes et diffinientes cantariam huiusmodi per nos et successores nostros de predicta terra inperpetuum observandam et inviolabiliter supportandam salvis nobis et successoribus nostris serviciis inde debitis et consuetis Volentes nihilominus quod idem Ricardus quoad vixerit quadraginta solidos sterlingorum de prefata terra ad cuiuscumque manus devenerit percipiat annuatim una cum commoditate et usu unius camera cum camino et cellario que est ex parte orientali mansi supradicti ita tamen quod post decessum predicti Ricardi dicta terra ab huiusmodi pensione quadraginta solidorum libera sit et quieta et cum camera memorata revertatur integraliter ad capellanum qui pro tempore contigerit ibi esse Istam itaque cantariam sic ordinatam taxatam et assignatam domino Roberto de Norham capellano et alumno predicti Ricardi de cuius meritis firmam spem in domino reportamus contulimus intuitu pietatis post cuius decessum statuimus et ordinamus quod per nos et successores nostros aliis successive capellanis idoneis notis et approbatis deinceps absque more dispendio conferatur Statuentes quod decetero sub nostra et successorum nostrorum speciali proteccione consistat et illibata permaneat et inconcussa Si quis autem huiusmodi ordinacionem nostram infringere presumpserit vel ei ausu temerario contraire maioris excommunicacionis sentenciam se noverit incursurum Et in testimonium premissorum sigillum nostrum presentibus duximus apponendum Dat apud Norham die sancti Bartholomei videlicet nono kal Septembris anno domini MCC Octogesimo Octavo et consecracionis nostre anno Quinto