Charter Document - 06460011
| Charter Number: | 06460011 |
|---|---|
| Cartulary Title: | The Records of Antony Bek. Bishop and Patriarch 1283-1311 |
| Charter Language: | Latin |
| Charter Origin: | Religious |
| Charter Type(s): | Request |
| Date: | 1288 |
| Date type: | Internal, A.D., Calendar |
| Resource Link(s): |
|
Charter:
Sanctissimo in Christo patri et domino intime reverendo domino Nicholao Dei gracia summo pontifici vestre sanctitatis servus humilimus pronus et devotus Antonius ecclesie Dunolmensis minister licet inutilis modicus et indignus se ipsum ad sanctissima genua provolutum et eciam visceraliter et ex corde desideratissima pedum oscula beatorum Benedictus pater omnipotens altissimusque creator et pius dispositor omnium que creavit qui merita bene merencium in hac vita sub modio et tenebrarum nubilo non sinit nec sustinet obfuscari quin pocius lucernas et lumina spiritualia creaturarum racionabilium partim abscondita tandem secundum magnifica meritorum opera certis Christi cultoribus in exemplum dirigit et producit Sane pater venerande fe nix singularis et divulgata felicitas in fenice que in ecclesia Anglicana secundum credulitatem et famam hiis diebus imminet et coruscat me mestum et miserum animat et excitat ad scribendum set vereor prescita et primitus pure precognita celebri vestro auditui importune et perperam inculcare inquam certis auribus temerarie et timide inculcare quia quo ad famam acceptabilem et creberrimum clamorem Regum regnorum et regni colarum quasi tocius orbis insignia varia virtutum actus acceptabiles meritorum et infinita profectus et pietatis exempla per vitam veram et virtuosam dum vixit et per mirificam munificenciam altissimi post mortem et casum tam excellentis abietis et cedri hactenus in ecclesia dei iam diucius pullularunt ac pie iam odorifere pullulant et subcrescunt pium igitur et meritorium opinor pater venerande et estimo coram deo de existencia et realitate fame centrum celeriter perscrutari et lucem producere in ecclesiis et Christi amatoribus affectatam Et ut cum vestra sancta licencia loqui passim Robertus quondam Lincolniensis episcopus est ortus causa et occasio suggestorum Conservet vos ecclesie et populo suo deus per tempora feliciter diuturna Dat London primo die mensis Maii Anno gracie millesimo ducentesimo octogesimo octavo