Charter Document - 06450008
| Charter Number: | 06450008 |
|---|---|
| Cartulary Title: | Eight Twelfth-Century Charters from the Norman Abbey of Saint-Étienne de Caen |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1156 - 1205 |
| Date type: | Assigned |
| Resource Link(s): |
|
Charter:
Henricus Dei gratia Baiocensis episcopus universis Christi fidelibus ad quos presens carta pervenerit eternam in Domino salutem Noverit universitas vestra quod Hugo de Noiers miles dedit et concessit in puram et perpetuam elemosinam Deo et beato Stephano Cadomi et monachis ibi Deo servientibus pro salute sua et suorum predecessorum consilio et assensu Willelmi fratris suis totum ius patronatus quod ipsi et suis predecessoribus conpetebat in medietate ecclesie de fontibus iuxta Taon Ita etiam quod Gillebertum personam illius ecclesie assignavit abbati et conventui eiusdem loci ut eis decetero ratione dicti patronatus esset tamquam patronis obnoxius et eos decetero patronos laudaret unde prius eundem Hugonem et eius antecessores dominos laudaverat et patronos ad uberiorem itaque huius rei firmitatem cenobio et beato Stephano comparandam Idem Gillebertus persona de nostra permissione et auctoritate se ipsis monachis ut patronis suis sacramento fidelitatis astrinxit salvo per omnia iure nostro et nostrorum officialium Preterea sciendum est quod idem Hugo dedit et elemosina sit Deo et prefato cenobio in puram et perpetuam elemosinam duas garbas decimarum de toto feodo suo apud eandem villam de fontibus et in toto eiusdem ville territorio videlicet in dominio in hominibus et in omnibus aliis terris de quibus decima debet et potest exire Ita quod Willelmus clericus frater eiusdem Hugonis qui eandem decimam habebat in elemosinam perpetuam ex dono et concessione Roberti de Noiers patris sui resignavit et dimisit eam spontaneus prefato cenobio libere et quiete ex integro in perpetuum possidendam Ut autem eorum que pie gesta sunt memoriam futuris unquam temporibus non obducat vel intercipiat oblivio scripture testimonio eadem duximus prosequenda et sigilli nostri munimine roboranda