Charter Document - 06430037

Sachent touz presenz et avenir que par devant nous en droit establiz Robert Le Guai et Pierres Le Clert de la paroisse de La Doree tutors donez de nos quanta ce aux effanz feu Estienble de Grigne requenurent que oux ou lor comandement avaient receu de l'abbe et do covent do Mont Saint Michel vint livres de tornais par la reson de la terre de Leonere asise en la dite paroisse de la Doree laquele terre l'abbe et le covent a lor comandement doivent porsairs a torjorz mes sanz nule reclamacion des airs do dit feu Estienble Et desdiz vint livres les diz tutors se tindrent par devant nos por bien paiez en non des diz airs du dit feu et promitrent et graerent en non dessus dit que par reson des dites choses james riens ne sera demande des diz airs audit abbe ne au covent Et a ce tenir et fere tenir au diz airs obligent les diz tutors eux et toz lor biens mesbles et immesbles presenz et a venir et par la foi de lour cors donee en nostre main que encontre ne vendrunt Et nos totes ces choses avon ajugie a tenir par le jugement de la cort au seignor de Maine et le scel de la dite cort a ces presentes lestres avon appose en tesmoig de verite sauve la dreiture a toz seignors feaux Ce done et otraie devant Colin Le Barber ou jour de semagdi devant la feste saint Denis en l'an de grace mil doux cenz quatrevinz et deiz ou mais de octovre