Charter Document - 06400079

Ego Robertus frater regis Francie comes Dro[carum et Agnes Brane cometissa uxor me]a cum filiis nostris notum volumus [fieri pre]sentibus et futuris quod compositio subscripta de manerio monachorum Gemmeticensium de Beu inter nos et Petrum ipsius loci abbatem mediante venerabili viro Roberto Carnotensi episcopo nutu fratrum ipsius loci ita facta est quod habebunt ipsi monachi propriam eam p[artem territo]rii de Beu quam via Drocensis tendens ad Coriletum Henrici dividit a castello de Beu habebunt quoque illius partis hospites ab omni om[nino] consuetudine quietos liberos et immunes ita etiam quod si forte aliquis eorum aliquem de hominibus nostris vel aliquem alium vulneraverit vel occider[it et] non detentus poterit inde evadere seque ultra pretaxatam viam in propriam monachorum partem recipere nulli omnino liceat eum eousque persequi [vel] ibi capere sed justiciam inde accipiemus per manum monachi qui prior erit de Beu Verumtamen parvum illud nemus quod est in parte propria monachorum nec nos nec monachi nec nostri vel eorum homines incident nec aliquo modo vastabunt sed communiter ad clausturam ville et castelli illud conservabunt Ea vero pars territorii de Beu que est ultra sepe dictam viam a parte castelli propria cedet nobis exceptis ecclesiis et hospitalicio [mona]chis ibi manentibus ex arbitrio et dispositione prefati episcopi dividendo Et ita etiam quod monachi habebunt decimam septimanam in om[nibus redi]tibus mercati et furnorum decimam quoque frugum et censuum omniumque omnino redituum quos nos vel heredes nostri in toto illo territo[rio] habuer[imus vel per] castellum de Beu excepto ecclesiarum jure adquirere potuerimus ita libere et quiete sicut et nos novem nostras habemus septimanas Porro etiam hab[ebunt] totum teloneum olerum porrorum alliorum et unionum omniumque herbarum que vendentur et ad pulmentaria faciunt Feriam vero sancti Leodegarii nos et monachi communem habebimus per medium necnon monachi et homines eorum in nemoribus de territorio de Beu et in aliis sub garantia et tuitione nostra accipient ligna et nemora ad calefaciendum et ad hospitandum ubicumque homines nostri ea acceperint Quod si contigerit aliquem hominum monachorum alicubi disturbari nos ipsum quasi aliquem de nostris propriis hominibus requiremus et liberabimus Omnia vero pascua utriusque partis hominibus nostris et hominibus monachorum erunt communia quamdiu pascua fuerint Concedimus etiam quod et abbas et conventus concesserunt et nobiscum statuerunt quod terre omnes que sunt de proprio territo[rio] de Beu hinc inde inter nos et monachos funiculo metiantur et partiantur per medium ita tamen ut agricola qui ante partitionem terram diruperit et de nemore extraxerit quiete eam habeat et excolat et domino cui terra illa in partem cesserit campi partem reddat In molendinis autem nostris quos habemus apud Ulmellos ni fluvio qui dicitur Blesia habebunt monachi decimam septimanam in annona et denariis ita libere et quiete sicut nos habemus nostras novem septimanas quamdiu ipsis placuerit mittere homines suos molere ad illos molendinos cum autem noluerint homines suos ad molendinos nostros ire sed ad alios molendinos molere in molendinis nostris decimam non habebunt nec reclamabunt Amplius si aliquis hominum monachorum in molendinis nostris aliquid in moltura foris fecerit duplicem reddet molturam pro emendatione per manum prioris de Beu Monachi quidem de annona sua quam molere facient in molendinis nostris ad usum suum et ad usum proprie familie nequaquam dabunt molturam Concedimus etiam monachis rogatu prenominati episcopi quod ibi capiant decimam suam ubi nos capiemus nostram campi partem Omnis preterea prepositus de Beu infra triduum quo preposituram acceperit faciet priori de Beu fidelitatem per sacramentum se legitime et fideliter observaturum illis et successoribus suis omnia jura sua in prescriptis reditibus sicut in presenti scripto continetur nec se aliquo modo prepedit urum quominus illis ad integrum reddantur Siquidem ego comes Robertus et Agnes comitissa uxor [mea] et filii mei vel quicumque terram tenebunt heredes nostri ex devotione et recognitione etiam quod sepe dictum castellum in terra Gemmeticensis monasterii est situm singulis annis in festo apostolorum Petri et Pauli decem solidatas cere trademus priori de Beu unde fiet cereus quem [idem prior ad] Gemmeticense monasterium deferat ut accensus in die festo ad memoriam et honorem ibi effulgeat quas decem solidatas [cere prior et prepositi] nostri de Beu in nostris censibus predicti castelli annuatim in festo sancti Remigii accipient easque homini quem fideliorem repu[taverint et a quo prior ad faciendum] cereum in festo sancti Joannis Baptiste receperit tradendas aptum duximus Pro quo beneficio et aliis a nobis ipsis monachis collatis jam[jam et conferendis singulis annis nostra anni]versaria celebrabunt necnon et heredum anniversaria quicumque post nos terram tenuerint Quod ut ratum per succedentia [tempora perseveret presentem cartam sigilli nostri] attestatione communivimus