Charter Document - 06400061

In nomine Domini nostri Jhesu Christi ad noticiam presentium et memoriam futurorum ad evitandam in posterum rerum oblivionem et adverse partis controversiam litteris annotamus et apicibus subsequentibus non abolendis temporibus commendamus qualiter pontificate papa Paschali anno ab incarnatione Domini MCXI sub rege Henrico abbas Ursus et postea ecclesie romane presidente papa Innocentio regnante rege Stephano abbas Willelmus anno ab incarnatione Domini MCXXXVIII calumpniam quam heredes Clari Balduinus videlicet et Clarus frater ejus de mansione que est apud Rothomagum Turris Rainerii cognominata et a beato Audeno sancto Philiberto et ecclesie Gemmeticensi jure perpetuo possidenda donata sicut principali comitis Ricardi auctoritate karta teste roboratum est diffinierunt que res se ita habet dominante in Normannia Rotberto comite in urbe Rothomagensi gravis dissensio inter partes Pilatensium scilicet et Callensium exorta est que multa civitatem strage vexavit et multos nobilium utriusque partis gladio prostravit Inter quos partis Pilatensium erat quidam rebus et nomine quem supra diximus valde Clarus qui abbati et monachis Gemmeticensibus pro suo actu et merito plurimum erat carus Hic ergo quia domus prefata in munitiori loco consistit rerum metuens eventum ut ibi hospes degeret expetiit et pro sua probitate et bonitate ad tempus impetravit Quo decedente et rege Henrico principante filius ipsius Balduinus hereditario jure mansionem ibidem violenter voluit optinere sed abbate Ursone equitatem judicii reposcente in causam vocatus et nichil rationis dicere visus judicio optimatum eadem domo exire et deinceps carere jussus est Qui videlicet judices hi fuerunt Gaufridus Rothomagensis archiepiscopus Johannes Luxoviensis episcopus Rotbertus comes Mellenti Willelmus comes Warenne Gislebertus de Aquila Willelmus camerarius de Tancardivilla Willelmus de Ferrariis Nonnullis postea evolutis annis cum Balduinus obisset in primordio excellentissimi regis Stephani Clarus ejusdem frater super eodem negocio regias aures pulsare et abbatem Willelmum cepit vexare Que causa multis locis et temporibus varie tractata est et multis modis ut penitus finiretur a nobilibus et prudentibus viris utrinque amicis elaboratum est Tandem in hoc rei summa devenit ut idem Clarus ab abbate iiii marchas argenti acceperit et fide data quod nec ipse nec quisquam suorum pro se vel per se de predicta domo ulterius calumpniam moveret abjuravit et filios suos qui tunc non aderant infra xl dies adventus eorum ab abbate conventus ad id se inclinaturum sub eadem fide promisit Itaque Willelmo de Roumara justiciam regis in Normannia conservante dominica natale Domini proxima precedente quod idem natale mortalibus cunctis honorandum subsequente proxima dominica erat celebrandum apud Rothomagum in domo que fuerat Audeni Postelli ista pactio a Godoboldo de Sancto Victore recitata ac perorata est et pecunia Claro tradita est sub principibus baronibus et testibus his Ludovico abbate Sancti Georgii Gualeranno comite Mellenti Willelmo comite Warenne fratre ejus Hugone de Gornaco Rotberto de Novo Burgo Johanne de Lunda Rogerio de Paviliaco Radulfo de Bosco Rohardi Rotberto Wesnevallis Osberno de Kailliaco Ingelranno de Wasclerio Walterio de Cantelou Waleranno de Mellente et Willelmo de Pinu Juhel consanguineo Clari Luca Pincerna Godoboldo de Sancto Victore Alveredo fratre ejus Stephano filio Radulfi Radulfo filio Rotberti Urselino de Wanteria Radulfo de Bellomonte Johanne fratre ejus Radulfo filio Ramboldi ex parte abbatis Gisleberto de Mara fidei susceptore Geroldus ad Barbam Rainoldo Nulpe Willelmo Clarello Rotberto Filiolo Waltero de Eudonis Villa Radulfo Calcaterram fratre ejus Rabello filio Goscelini