Charter Document - 06400018
| Charter Number: | 06400018 |
|---|---|
| Cartulary Title: | Chartes de l'Abbaye de Jumièges (v. 825 à 1204) |
| Charter Language: | Latin |
| Charter Origin: | Lay |
| Charter Type(s): | Grant |
| Date: | 1037 - 1043 |
| Date type: | Assigned |
| Resource Link(s): |
SCRIPTA - Base des actes normands médiévaux Archives départementales de Seine-Maritime - 9 H 1514/1 |
Charter:
Divine scripture que nobis ad paradisi sedem de qua per primi parentis lapsum decidimus remeandi iter ostendit paginis edocemur quatinus dum vivimus [bona] operari studeamus et ex his que nobis Dei omnipotentis miseratio bonis contulit suorum fidelium indigentiam relevare non onerosum sit Namque ibi thesauros nostros recondere jubemur ubi [erugo et tinea] que demoliri eos possint penitus non inveniuntur Quod tunc denique fit cum ex bonis [a Deo nobis] attributis pauperum inopiam reficimus aut ecclesiis Dei ea perpetuum possidenda contradimus Quod ego Rotbertus servorum Dei ultimus mentis archano revolvens et presentis seculi gloriam si pro ea eterna vita negligitur non nisi ad nostrum interitum profuturam considerans Dei cuncta disponentis motus instinctu aliquid ex mei juris beneficio Deo servisque suis impartire studeo Est igitur mihi inter cetera que Deo auctore possideo bona quedam terra in loco qui Cupinne vocatur in comitatu Ebroice civitatis sita que videlicet proxima adjacet terre Gaudiaci vici sancti Petri Gemmeticensis monasterii Hanc ego Deo et sancto Petro in Gemmetico monasterio ad usus servorum Dei inibi habitantium perpetualiter possidendam concedo consensu atque voluntate Ricardi ejusdem Ebroice civitatis comitis faventibus etiam cunctis filiis et parentibus meis pro ipsius scilicet domini mei Ricardi anime amminiculo necnon et pro mee ceterorumque amicorum sive heredum meorum requie ut habeant teneant atque eternaliter sine ullius hominis usurpatione vel contradictione possideant Pro qua etiam terra decem et novem libras denariorum ab abbate ipsius loci nomine Rotberto sive a monachis ibi degentibus accepi ne quis perversitate diabolica infectus huic rei contradicere penitus audeat Quod si furiosus quisquam et diabolice malignitatis veneno tumens hanc donationem infringere presumpserit a sanctorum omnium cetu semotus perpetualibus incendiis perpetualiter urendus nisi resipuerit tradatur Et ut hec cuncta perpetuum firma permaneant propria manu subter firmavi dominoque meo comiti Ricardo firmanda tradidi
Source (click image below to view full size)
