Charter Document - 06400016
Charter Number: | 06400016 |
---|---|
Cartulary Title: | Chartes de l'Abbaye de Jumièges (v. 825 à 1204) |
Charter Language: | Latin |
Charter Origin: | Lay |
Charter Type(s): | Protection |
Date: | 1014 - 1031 |
Date type: | Assigned |
Resource Link(s): |
SCRIPTA - Base des actes normands médiévaux Archives départementales de Seine-Maritime - 9 H 29/1 |
Charter:
Regni Francorum monarchiam rege Rotberto strenue gubernante quidam eximie nobilitatis vir Albertus nomine ipsius regis majestatem adiit humili prece implorans quatinus quod ei voto inerat scilicet quasdam res cupiens sancto contradere Petro apostolo Gemmeticensis cenobii in pago Pingesiaco loco qui ad Sanctum Martinum nuncupatur sitas pro anime sue parentumque suorum aminiculo videlicet patrui sui loci ejusdem abbatis Anne nomine et patris sui Alberti ceterorumque illius voluntate ac auctoritate perenni firmaretur Cujus petitioni ipse prepotentissimus princeps libentissime annuit Concessit ergo ecclesiam unam cum vineis multis et indominicatis et aliis terrasque arabiles cultas et incultas cum prato et omni terra que pertinet ad eundem vicum Quibus peractis isdem Albertus quod Deo sanctoque tradiderat Petro liberum ab omnibus malis inquietudinibus volens esse ac quietum me comitem Walerannum aggressus michi mulum magni pretii unum dedit eo pacto ut numquam per me nec per quemquam meorum ullius rei dampnum illi loco ideo quippe quia vicinus meo castello est inferrem Ejus igitur rogatui favens mulum recepi atque fide mea eundem locum me servaturum promisi et diu in promissione perseveravi donec Rotbertus Nortmannorum dux quasdam terras in Nortmannicis partibus michi auferens zelo iracundie agitatus prefatum locum vi cepi meoque dominio subegi Quod Albertus abbas necne pater Gemmeticensis cenobii Willelmus nomine audientes ilico me adierunt conventionibus inter nos quoque actis x libras nummorum michi dederunt ea profecto gratia ut quousque hic cosmus volvetur per me heredesque meos ac eorum successores exinde detrimentum nunquam sustineant Et licet firmissima pace an discidio discordie Franci Nortmannique vigeant tamen prelibata possessio tuta perenniter sistat Porro tributum malivola hominum futurorum vehementer cupiditate inardescente si decreverint in altari non plus tribuant quam hoc nostro tempore illis concessum est dare videlicet pro unaquaque tonna in descensione denarios xii Quod denique ipse manu propria subter firmavi Signum Vualeranni comitis Signum Hugonis filii ejus Signum Adilais uxoris ejus Ceterum si quis ex meis posteris auctore diabolo et avaritie facibus accensus hanc conventionem quocumque modo corrumpere presumpserit sub Patris et Filii et Spiritus Sancti maneat anathemate et ab omnibus sanctis Dei reprobatus et condemnatus de libro vite deleatur et cum illis inscribatur qui diris vocibus acclamabant Crucifigatur diabolo traditus eternis incendiis eternaliter urendus Amen Acta est hec descriptio Heinrici Regis temporibus Signum Widonis Signum Haymonis Signum Odonis Signum Nivardi Signum Tedevuini vicecomitis