Charter Document - 06390407

Cum ab ecclesia Lingonensi abbatia Divionensis fundata sit et possessionibus dilatata ego Robertus Dei gratia Lingonensis episcopus eamdem abbatiam tanto debeo affectuosius amare et latius amplificare quanto diebus sacerdotii mei populum Dei et numero et merito constat multiplicius accrevisse Cui etsi nova beneficia prout volo conferre non valeo saltem ut possessa antiquitus liberius possideat opem quantum possum denegare non debeo Ecclesiam sancti Joannis Baptiste et ecclesiam sancti Philiberti sitam in cimiterio beati Benigni constat antiquitus Divionensem abbatiam possidere sed per pravas quorumdam adinventiones de illo antiquo jure plurimum amississe Unde exoratus a domino Jarentone abbate et a monachis ejus et donum illud antiquum quo eedem ecclesie sancto Benigno date fuerant laudavi et ut liberius eas in posterum Divionensis ecclesia possideat aliquid addere procuravi Volo itaque et hujus mee descriptionis auctoritate precipio ut ecclesias supramemoratas ecclesia Divionensis quieto jure possideat cum in qualibet earum presbiter fuerit ponendus vel removendus penes abbatis et monachorum maneat arbitrium et de substituendo et de removendo eorum erit presbiteros qui prefatis ecclesiis deserviant providere et provisos ad decanum adducere qui decanus sine ulla dilatione statim in presentia abbatis seu monachorum curam animarum committet presbiteris quos illi presentaverint Si episcopus vel archidiaconus venerit Divionem cum ab aliis presbiteris expense necessarie requirentur isti liberi remanebunt et id quod in hujusmodi exactione vel deprecatione vel expensis daturi erant dabunt in obsequium abbatis et monachorum si abbati et monachis placuerit Excomunicationes et generalia edicta episcopi custodient ita ut eum quem episcopus excommunicaverit vel interdixerit ipsi nullatenus recipiant donec eum episcopus absolvat Si pro privata injuria Divionensi ecclesie illata abbas aut monachi preceperint ut non cantent cantare cessabunt et rursum cum eis cantare preceperint nullius alterius expectata licentia cantabunt Si abbas aut monachi tales presbiteros poterint invenisse qui mundo velint renunciare et tamen ad jussum abbatis in clericali habitu consentiant remanere liberam habebunt licentiam abbas et monachi predictas ecclesias hujusmodi presbiteris commitendi Supradictarum ecclesiarum redditus omnes in jus cedent abbatis atque monachorum nec in eis quicquam presbiteri constituti proclamabunt nisi quantum inter eos et abbatem constitutionis sue tempore convenerit Ego Vilenchus archidiaconus de cujus ministerio prefate ecclesie sunt hanc donationem laudavi Ego Paganus decanus laudavi Hanc donationem feci ego Robertus Linguonensis episcopus Deo et sancto Benigno in capitulo Divionensi per manum domni Jarentonis abbatis in presentia domni Gaufridi prioris et aliorum monachorum Que ut firma permaneat sigilli mei impressione eam confirmo