Charter Document - 06390401
| Charter Number: | 06390401 |
|---|---|
| Cartulary Title: | Chartes et documents de Saint-Bénigne de Dijon: prieurés et dépendances, des origines à 1300 |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1102 |
| Date type: | Internal, A.D., Papal |
| Resource Link(s): |
TELMA - Traitement électronique des manuscrits et des archives |
Charter:
Paschalis Episcopus Servus Servorum Dei Dilecto Filio Gerentoni Abbati Divionensis Monasterii salutem et apostolicam benedictionem Officii nostri nos hortatur auctoritas pro ecclesiarum statu sollicitos esse et que recte statuta sunt stabilire Proinde commutationem illam que inter vos et Cadomensis cenobii abbatem Gilbertum facta est decreti pagina confirmamus ut que in Normannorum finibus cenobium Divionense possederat id est ecclesiam sancti Alberti cum appendiciis suis et ecclesiam de Longo Campo cum terris et decimis deinceps in Cadomensis monasterii possessione permaneant et rursum que Cadomensis ecclesia in Burgundionum regione possederat id est monasterium sancti Ypoliti curie Bertalt cum omnibus appendiciis deinceps in Divionensis cenobii jure persistant Confirmamus etiam vobis vestrisque successoribus monasterium sancti Vigoris cum omnibus ad ipsum pertinentibus tam in hominibus quam in possessionibus et decimis videlicet plena decima totius ville in qua monasterium situm est et omnium ad eandem villam pertinentium et plena decima de Tor et de Crisseio et de Olferes et de Colgrino et de tota Cricha villa cum terris presbiterorum sicut vobis a bone memorie Oddone Baiocensi episcopo tradita et principis et aliorum assensibus est roborata Item confirmamus illud donum quod fecit Robertus dux Normannorum prefato monasterio de suis dominicis rebus tam in passagio et teloneo quam in ceteris exitibus et per totam terram suam liberis consuetudinibus et quatuor asinis in Vernegio cotidie viridi ligno onerandis Quicquid preterea hodie vestrum cenobium quiete possidet sive in futurum concessione pontificum liberalitate principum vel oblatione fidelium juste atque canonice poterit adipisci firma tibi tuisque successoribus et illibata permaneant Si qua sane ecclesiastica secularisve persona hanc nostre constitutionis paginam sciens contra eam temere venire temptaverit secundo tertiove commonita si non satisfactione congrua emendaverit potestatis honorisque sui dignitate careat reamque se divino judicio existere de perpetrata iniquitate cognoscat et a sacratissimo corpore ac sanguine Dei et Domini Redemptoris nostri Jhesu Christi aliena fiat atque in extremo examine districte ultioni subjaceat cunctis autem eidem loco justa servantibus sit pax Domini nostri Jhesu Christi quatinus et hic fructum bone actionis percipiant et apud districtum judicem premia eterne pacis inveniant Amen Amen Amen Scriptum per manum Petri notarii regionarii et scriniarii sacri Palatii Ego Paschalis Catholice ecclesie episcopus subscripsi Verbo Domini celi firmati sunt Sanctus Petrus Sanctus Paulus Paschalis PP II Data Laterani Per manum Johannis sancte Romane ecclesie diaconi cardinalis II idus martii indictione X incarnationis dominice anno MCII pontificatus autem domni Paschalis secundi pape III Bene Valete