Charter Document - 06390312
| Charter Number: | 06390312 |
|---|---|
| Cartulary Title: | Chartes et documents de Saint-Bénigne de Dijon: prieurés et dépendances, des origines à 1300 |
| Charter Language: | Latin |
| Charter Origin: | Royal |
| Charter Type(s): | Decree |
| Date: | 1032 - 1035 |
| Date type: | Assigned |
| Resource Link(s): |
|
Charter:
Ego Robertus gratia Dei dux et princeps Normannorum omnibus fidelibus Christiane religionis notam fieri volo eleemosynam quamdam predecessorum meorum Beate memorie avus meus cum pro anime sue salute plurima sacris locis prope ac longe positis conferret beneficia contulit etiam Divionensi cenobio gloriosissimi martyris Benigni nomine et corpore sacrato quandam ecclesiam que dicitur sancti Adalberti in comitatu Oximensi sitam cum terris omnibus ad eam pertinentibus hortatu ac supplicatione religio[si]ssimi viri abbatis Willelmi quem postea pro sue vite sanctitate genitor meus Ricardus de prefato cenobio ad Fiscannense monasterium regula[ri]ter ordinandum evocavit ubi completis bonorum laboribus operum pacifice requiescit Postea vero aliquanto exacto tempore quidam patris mei miles nomine Golbertus a predicto abbate sepius honoratus dedit prefato loco cum consensu et auctoritate ejusdem genitoris mei quondam sui juris ecclesiam in villa que Longus campus dicitur sitam cum XVIII acris arabilibus terre adhibitis idoneis testibus scilicet domino Roberto Rotomagensi archiepiscopo Rodulfo Umfredo Turfredo et aliis quam pluribus Que donatio ut stabilis et firma in perpetuum maneret suggerente etiam sepe dicto patre meo dedit postea eidem Golberto abbas Willelmus LX libras denariorum Non post multum vero tempus quadam necessitate cogente tradidit predictas ecclesias cum sibi pertinentiis sepe nominatus abbas cuidam homini nomine Attoni quem Follem dicebant loco pignoris quod nos vadium dicimus acceptis ab eo centum denariorum libris Paulo post autem cum nulla spes esset redimendi tactus pater meus divina inspiratione dedit de camera sua predicto Attoni centum libras nummorum et recepit in suam eleemosynam predictas ecclesias cum integritate et reddidit Sancto Benigno per manus domni Willelmi abbatis tali tenore ut ipse advocatus tutor et custos existeret ejusdem beneficii et successores sui usque in sempiternum contra omnes adversarios vel calumniatores monachorum predicti cenobii Mortuo namque venerabili abbate Willelmo venit ad me successor ejus abbas Halinardus cum domno Johanne Fiscannensi abbate rogans et deprecans ut predicta beneficia predecessorum meorum simili voluntate et autoritate tenerem et custodirem Quod libenter annuens eorum voluntati confirmo stabilio omnique auctoritate corroboro Et ut ipse mercedem cum ipsis predecessoribus meis a largifluo largitore Domino adjutus meritis beati martyris Benigni recipere merear manu mea signum crucis faciens auctorizo Et ut hujus confirmationi[s] mee cartula apud posteros credibilior habeatur fratris mei Willelmi et aliorum fidelium meorum manibus ac subscriptionibus tradidi roborandam