Charter Document - 06390266

In Nomine Sancte et Individue Trinitatis Patris et Filii et Spiritus Sancti Unius Majestatis Unius Virtutis Unius Potestatis Regnantis nunc et semper et per infinita seculorum secula ipsi gloria virtus et potestas decus et imperium amen Prisce auctoritatis institutione traditum retinemus ecclesie domesticos ecclesiasticis participare debere beneficiis nec solum illos qui divinis artius mancipantur sacramentis verum etiam eos qui exterioribus intenti negotiis celestibus solummodo inservientes sua procuratione tuentur et ut quietius Deo militent ope competenti amminiculantur sicut etenim dicente Apostolo Multi unum corpus sumus in Xpisto et singuli alter alterius membra ita Ecclesie beneficia Ecclesie filiis unitate fidei conexis et Xpistiane culture devotione invicem sibi pietatis officio famulantibus censemus distribuenda et inmutilata ejusdem Ecclesie portione non am[big]imus esse impertienda Unius namque mense soliti sunt participare convivio qui in Patris familias domo diverso deserviunt officio Augetur quoque hujusmodi liberalitatem pl[erum]que facultas Ecclesie potius quam dematur quia dum gratanter beneficiali jure suscipiunt non proprium velut boni servi festinant de proprio reddere cumulatum Unde multipli[cibus ter]rarum copiis ecclesie fines dilatatos esse cernimus et Dei largitate uberius delitiarum opulentium circumquaque affluimus Quapropter ego L[ambertus] Dei bonitate Lingonum constitutus e[piscopus] notum fieri Xpistiani nominis cupio domesticis quod quidam meorum fidelium Aimo nomine conveniens B[eraldum] ecclesie nostre prepositum interpellare cepit quatinus apud me auxilii sui supplementum illi imp[end]eret et uxori sue cum duobus heredibus abbatiam sancte Marie Saxonum fontis quam ipse tenebat a me impetrare studeret Qui more solito incunctanter me adiens petitionem predicti fidelis mei sedulus intimavit Addidit etiam portione prediorum suorum atque ser vorum illum velle abbatiam datare et augere si consensum sue postulationi vellem prebere Cujus supplicationi favere dignum duxi et adimplere sicut petierat causa sue dilectionis non distuli Dedi igitur uxori predicti viri nominate Cunegundis cum duobus suis filiis quorum hec sunt nomina Heynricus videlicet et Ottho abbatiam sancte Marie scilicet Saxonum fontis hujusmodi jure ut quandiu ipsa vixerit abbatiam in melius augmentando possideat et clericos ibi Deo sancteque Matri ejus famulantes custodiat et res ecclesie nulla ratione dispertiat Post cujus obitum si prefati filii supervixerint eodem dominationis jure in fidelitate mea vel meorum successorum Heynricus teneat et sicut premisimus curam stabilitatis ejus non neglegat huic vero si Ottho superstes fuerit et ipse sicut precedens frater tenuit firma stabilitate teneat et vita comite possidere valeat Quibus predictis tribus matre videlicet et filiis decedentibus mee dominationi si supervixero aut mei c[uju]scumque successoris abbatia restituatur et a nemine calumpnia ecclesie nostre inferatur Dotem vero abbatie predictus Aymo donavit in comitatu Barrensi in villa que Mainbodi Spania d[icitur a]lodum indominicatum cum mancipiis ad eum pertinentibus Stephano videlicet et fratre ejus cum ceteris omnibus Si quis autem heredum eorum post mortem ipsorum calumpniam ecclesi[e nostre] de hoc dotis beneficio inferre presumpserit legibus convictus auri libras X persolvat et ecclesie datum inconvulsum persistat Horum itaque notitiam apicum fieri annue[n]tibus clericis nostris atque laicis precepi ut eorum testimonio factum istud robur soliditatis accipiens illis perduret quod a nobis conceditur et ecclesie nostre permaneat dotis predium quod impenditur Actum publice Lingonis anno incarnati Verbi MXVIIII indictione II X kalendas februarii anno regni R[otberti] XXVIIII regnante Domino nostro Jhesu Xpisto cum Patre et Sancto Spiritu Lambertus episcopus signavit Oddo decanus s Wido laicus s Beraldus prepositus s Bruno archiclavus s Beraldus archidiaconus s Girardus levita s Ansculfus s Constancius s Mauritius s Hugo s Rothgerius s