Charter Document - 06390247
| Charter Number: | 06390247 |
|---|---|
| Cartulary Title: | Chartes et documents de Saint-Bénigne de Dijon: prieurés et dépendances, des origines à 1300 |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1012 |
| Date type: | Assigned |
| Resource Link(s): |
TELMA - Traitement électronique des manuscrits et des archives |
Charter:
Benedictus sancte universalis Ecclesie presul dilecto in Xpisto Jhesu filio Vullelmo abbati monasterii Divionensis ejusque successoribus regulariter substituendis salutem et apostolicam benedictionem Ex injuncto nobis officio sanctorum locorum quieti debemus invigilare ut quanto quietius tanto devotius in eis Domino serviatur Proppterea karissime fili Vullelme petitionibus tuis annuentes monasterium vestrum sub protectione apostolica conservandum statuimus et ne ab episcopo Lingonensi aut ejus successoribus divinum in ipso monasterio interdicatur officium prohibemus Quod etiam beati Gregorii auctoritate confirmamus qui Johannem episcopum de Urbe Veteri pro hoc increpat et interdicit ne divina officia prohibeat in cenobiis celebrari quia quocies hoc vel aliquid inusitatum in monasteriis geritur tenor inde regularis impeditus non parum a custodia religionis relaxatur Quo exemplo decernimus in Divionensi monasterio divinum officium pro statu sancte Ecclesie continue celebrari quatinus frequentata celebratio missarum et oratiorum turbines ac procellas infestantium valeat sedare nisi quod absit Lingonensi ecclesie vel eidem monasterio infractione aut predicte sedis presulis captione aliquo modo accidente pro quibus sponte debent ab officio cessare Omnium etiam monachorum tuorum quoslibet excessus secundum Dei timorem et beati Benedicti regulam paterna adnimadversione habeas castigare nec ulli episcoporum liceat in eos excommunicationis vel interdicti proferre sententiam seu quibuslibet angariis vel indictionibus fatigare quandiu ipsi monachi vestre discipline subdi voluerint et regularibus institutionibus supponi Quecumque vero privilegia predecessorum meorum quecumque precepta regum vel imperatorum quecumque scripta Lingonensium antistitum aliarumque personarum idem cenobium noscitur possidere nos presenti decreto corroboramus necnon possessiones dignitates atque libertates que in ipsis paginis continentur annotate auctoritate beati Petri et nostra integras et illibatas perpetuo manere sancimus Horum si quis contrarius transgressor extiterit anathematis mucrone se a nobis multatum pro certo noverit Data kalendas decembris per manus Petri sancte apostolice sedis bibliothecarii indictione X