Charter Document - 06390245
| Charter Number: | 06390245 |
|---|---|
| Cartulary Title: | Chartes et documents de Saint-Bénigne de Dijon: prieurés et dépendances, des origines à 1300 |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1012 |
| Date type: | Assigned |
| Resource Link(s): |
|
Charter:
Benedictus sancte universalis Ecclesie presul Brunoni Lingonum presuli salutem et apostolicam benedictionem Monasterii martiris Benigni quo Vuillelmum in sancto proposito studiosum monacum abbatem a te didicimus ordinatum privilegia predecessorum meorum precepta etiam filiorum nostrorum regum Francie a te et ab ipso abbate michi transmissa relegi atque ut tua poscebat bonitas corroboranda statui Quecumque igitur de burgo claustro cimiterio potestatibus appendiciisque omnibus que juris predicti sancti noscuntur ipsi sanxerunt et que antecessores tui suis decretis censuerunt hec Dei beatique Petri apostoli et nostra auctoritate privilegii nostri littere confirmandum decreverunt horum si quis contrarius transgressor extiterit anathematis mucrone se a nobis multatum pro certo noverit Monemus etiam predictum locum tua protectione defendi ab externorum infestationibus et a tuorum importunitatibus et quoniam novimus te quod successores tuos timemus non agere proposito religionis favere monastice et eundem locum a te construi et amari ideo prohibemus denominato abbate suppliciter exorante a te vel a tuis successoribus divinum ibidem officium interdici quod etiam beati Gregorii auctoritate confirmamus qui Johannem episcopum de Urbe Veteri pro hoc ipso increpat et interdicit ne in cenobiis divina officia celebrari prohibeat quia quotiens hoc vel aliquid inusitatum in monasterio geritur tenor inde regularis impeditus non parum a custodia religionis relaxatur Quo exemplo decernimus in Divionensi monasterio divinum officium pro sancte statu Ecclesie continue celebrari quatinus frequentata celebracio missarum et orationum turbines ac procellas infestantium valeat sedare nisi quod absit Linguonensi ecclesie vel eidem monasterio infractione aut presulis predicte sedis prodicione sive captione aliquo modo accidente pro quibus sponte debent ab officio cessare Valete Data pridie kalendas decembris per manus Petri sancte apostolice sedis bibliothecarii indictione X