Charter Document - 06380119
| Charter Number: | 06380119 |
|---|---|
| Cartulary Title: | Chartes et documents de Saint-Bénigne de Dijon: prieurés et dépendances, des origines à 1300 |
| Charter Language: | Latin |
| Charter Origin: | Religious |
| Charter Type(s): | Acknowledgment |
| Date: | 0880 |
| Date type: | Internal, Calendar, Episcopal |
| Resource Link(s): |
|
Charter:
Depositio domni Isaac Lingonice urbis episcopi Hic mirande sanctitatis refulgens gratia et sequacibus suis vite factus est forma et auctoritate fultus regia commissum sibi a Deo episcopatum sapienti dilatavit industria nonnullaque in eo sanctorum extruxit loca Inter que et hoc Divionense monasterium olim quidem refertum religiosorum caterva monachorum sed tunc infesta paganorum vastatione destructum in qualem valuit non vero sicut voluit hora mortis dies ejus terminante reformavit statum In cuius nova reedificatione adeo tota incubuit mentis devotione ut non solum terris sed ornamentis regali dono concessis ditaret verum etiam abbatem secundum regulam sancti patris Benedicti monastico gregi ordinaret sepultureque sue locum ibidem destinaret Qui videlicet XXV annis in episcopali regimine transactis cum XV kalendas Augusti quievisset in Christo Catalaunis sepultusque fuisset Remis permissione regis Caroli studioque presulis Argrimi successoris sui exinde advectus est hic et reconditus ut vivens preceperat IV nonas februarii Huius ergo anniversaria depositionis commemoratio ideo a nobis devote est agenda et debite orationis officio et placabili oblationis sacramento quatinus incrementa operum bonorum huius monasterii habitatorum perveniant et ad eterne mercedis augmentum in retributione justorum