Charter Document - 06370482

A toz ceus qui ces lettres verront frères Michiaus diz abés de Barbeel et toz li couanz de ce leu saluz an notre Seigneur Sachent tuit que les messons que nous avons à Provins o neuf marchié près des messons de Prulli de l'autre part de la voie desqueles deux tienent ansamble et l'autre parfois sont an la joutise et an la garde Thibaut noble roi de Navarre conte de Champaigne et de Brie palatin et de ses oirs ne nous ne poons autre gardeeur ne autre défendeeur apeler ne feire de ceiles messons se lui non et ses oirs et cet asavoir que ès devant dites messons nous ne devons ne poons vendre avoir ne marcheandise de foire au tens de foire ne autres ausi ne puet vendre au tens de foire avoir ou marcheandise de foire Ces lettres furent feites an l'an de l'incarnation mil et deus cenz et quarente set o mois de avril