Charter Document - 06370467

In nomine patris et filii et spiritus sancti Amen Omnibus presentes litteras inspecturis magister Robertus officialis curie Senonensis in Domino salutem Proposuerunt in jure coram nobis abbas et fratres Prulliacenses contra magistrum Lucam decanum Parisiensem fratrem Vincentium monachum Sancti Remigii Senonensis et relictam Guillelmi Becant executores ut dicitur testamenti dicti defuncti [] quod cum idem defunctus quinque annis et amplius jam elapsis antequam decederet in libera potestate existens dederit et concesserit donatione inter vivos in puram et perpetuam elemosinam abbati et conventui Prulliacensibus et eorum monasterio duas partes omnium mobilium et immobilium que habebat et possidebat et que ex tunc posset adipisci dicti executores [in] prejudicium et gravamen dictorum Prulliacensium impediunt et perturbant quominus ipsi Prulliacenses vel eorum mandatum possint duas partes dictorum mobilium et immobilium pacifice possidere et quiete nec admittunt ipsos seu admitti permittunt ad possessionem bonorum mobilium et immobilium predictorum quare petebant dicti Prulliacenses ipsos executores compelli ad [hoc et ut] ipsos vel eorum mandatum admitterent ad possessionem bonorum omnium predictorum et ipsos permitterent predicta pacifice possidere Petierunt etiam dicti Prulliacenses a dictis exe[cutoribus] sibi restitui dampna et deperdita que ipsi incurrerant et habuerant occasione impedimenti et perturbationis predicte que estimabant ducentas marcas argenti lite igitur super hiis [plenius] contestata prestito hinc inde calumpnie sacramento dixit procurator dictorum Prulliacensium post sacramentum suum omnia et singula contenta in petitione ipsorum Prulliacensis ec[clesie] excepto quod de dampnis et deperditis dixit se non esse certum ad presens Ad quod responderunt dicta relicta et procurator dictorum decani et fratris Vincentii quod revera [dictus Guillelmus] dederat et concesserat ipsis Prulliacensibus et monasterio suo duas partes omnium mobilium et immobilium suorum que tempore donationis ejusdem possidebat et de cetero posset a[dipisci] tamen quod memoratus defunctus omnia predicta quamdiu viveret possideret dicentes dictam donationem nullius esse momenti eo quod post eandem donationem idem defunctus f[ratri osten]dit testamentum per quod dicta donatio intelligitur fuisse revocata Dixerunt etiam quod tam ipsa relicta quam alii executores impediunt et impedient pro posse suo et [faci]ent impediri dictos Prulliacenses quominus apprehendant possessionem bonorum de quibus dictus defunctus erat in possessione tempore quo decessit ex persona dicti defuncti et juste eo q[uod] idem defunctus in suo testamento precepit voluit et concessit quod omnia debita sua et male acquisita de bonis suis solverentur et postmodum de residuo bonorum suorum legata sua solverentur per manum ipsorum executorum Auditis vero postmodum partium positionibus ad easdem et hiis que partes proponere voluerunt visis etiam instrumentis hinc inde pro[posi]tis die veneris post assumptionem beate Marie virginis continuata a die jovis precedenti assignata coram nobis dictis partibus ad audiendum deffinitivam sententiam fratre Vincentio [corpora]liter et tam dictis Prulliacensibus quam decano et relicta per procuratores cum litteris de rato sufficientibus coram nobis comparentibus et sententiam ferri poscentibus quia dicti Prulliacenses intenti[onem] [] sufficienter probaverunt nec propositum est et probatum aliquid a parte adversa propter quod donatio predicta facta Prulliacensibus debeat annulari nos eam quantum ad mobilia et conquestus dicti defuncti [] [pertinet et] ad hereditatem eatenus tantum quatenus secundum consuetudines approbatas donare potest in ultima voluntate ne sic contra heredes suos posset aliquis fraudem committere ra[tam] habentes executores predictos ad hoc quod Prulliacenses ipsos admittant ad possessionem duarum partium mobilium et immobilium dicti defuncti cum moderatione predicta facta quoad ea que movent [] hereditate dicti defuncti et permittant eos bona illa pacifice possidere per diffinitivam sententiam condempnamus ipsos quoad dampna que dicti Prulliacenses non sunt prosecuti ab eorum imp[ar]titione absolventes Datum die veneris supradicta anno Domini millesimo ducentesimo quadragesimo quinto