Charter Document - 06370437
| Charter Number: | 06370437 |
|---|---|
| Cartulary Title: | Chartes et documents de l'abbaye cistercienne de Preuilly |
| Charter Language: | Latin |
| Charter Origin: | Lay |
| Charter Type(s): | Judgement |
| Date: | 1242 |
| Date type: | Internal, A.D. |
| Resource Link(s): |
|
Charter:
Omnibus presentes litteras inspecturis officialis curie Senonensis in Domino salutem Notum facimus quod in nostra presentia constitutus Johannes de Floriaco miles dicens et confitens se ratione balli cujusdam pueri nomine Johannis filii quondam defunctorum Roberti de Bello Monte militis et Margarete quondam uxoris sue tenere terram de hereditate ipsius Johannis de Floriaco militis moventem et quod post decessum illius pueri terra illa debet ad eumdem Johannem de Floriaco militem devenire recognovit se monuisse fratres Prulliacenses ut ipsi extra manum suam ponerent salagium quod eis dederat in elemosinam apud Musterolium bone memorie Avelina de Acrivilla ut dicebat idem Johannes miles et quandam domum sitam in porta Musterolii quam acquisierant iidem fratres a Jacobo presbitero filiastro Norberti de Musterolio monetarii et a predicta Avelina et a defuncto Matheo de Varennis milite et censum et jus que acquisierant in eadem domo fratres predicti et septem arpenta tam terre quam prati et hayam que eisdem fratribus defuncta Margareta domina de Pareto dederat in elemosinam et septem alia arpenta terre que eisdem fratribus Egidius Faber et uxor ejus dederant in elemosinam et viam quam eisdem fratribus concessit Henricus de Pareto miles per nemus suum quod dicitur Valenceis ut dicebat idem Johannes miles asserens omnia premissa movere de feodo predictorum Roberti de Bellomonte militis et Margarete uxoris ejus Item recognovit coram nobis predictus Johannes miles se monuisse predictos fratres Prulliacenses ut ponerent extra manum suam omnia alia quecumque predicti fratres acquisierant in censiva vel in dominio sive in feodo predictorum defunctorum Roberti de Bello Monte militis et Margarete uxoris ejus Tandemque post premissas monitiones veritate et viris fide dignis diligenter inquisita et plenius intellecta ac consilio habito a prefato Johanne milite cum viris peritis sicut eodem milite audivimus confitente idem Johannes miles recognovit coram nobis quod omnia superius memorata et quecumque in censiva dominio et feodo predictis iidem fratres usque ad presens tempus acquisierunt bona fide et justo titulo possident Recognovit etiam coram nobis idem Johannes miles quod nichil omnino juris habebat in aliquo premissorum aliqua ratione et si quid forte juris habebat et habere poterat in premissis vel in aliquo premissorum illud penitus quittavit et remisit coram nobis idem Johannes miles fratribus supradictis volens et concedens ut iidem fratres omnia premissa et singula libere quiete et pacifice possideant in perpetuum fiduciavitque in manu nostra dictus Johannes miles quod contra recognitiones concessionem et quittationem predictas per se vel per alium non veniet in futurum Johannes insuper et Guillelmus filii prenotati Johannis militis similiter coram nobis quittaverunt fratribus memoratis quicquid juris habebant vel habere poterant in premissis quacumque ratione spontanei non coacti fiduciantes in manu nostra quod contra hec omnia et singula per se vel per alium non venient in futurum subjicientes se dicti Johannes miles et predicti filii sui quantum ad hoc quocumque eant vel maneant jurisdictioni curie Senonensis Actum anno Domini millesimo ducentesimo quadragesimo secundo mense decembri